Foda: Suedia favorit, por do të bëjmë gjithçka ta fitojmë ndeshjen
Trajneri Franco Foda ka folur në konferencë për media për ndeshjen e nesërme ndaj Suedisë, ku është shprehur optimist për rezultat pozitiv, edhe pse ka thënë se kombëtarja suedeze është favorite.
Ai ka thënë se ka analizuar gabimet që janë bërë në ndeshjen me Zvicrën, dhe shtoi se janë përgatitur për ndeshjen ndaj Suedisë.
Foda tha se kombëtarja jonë do të luajë para tifozëve të saj dhe synojnë t’i gëzojnë fansat.
“Suedia është favorit, por për mua është ta tregojmë një ndeshje tjetër nga ajo kundër Zvicrës, dhe do të bëjmë gjithçka që ta fitojmë këtë ndeshje”, tha Foda.
Ai ka folur edhe për mungesën e Amir Rrahmanit, me ç’rast ka thënë se si kapiten dhe lider do të mungoj, por shtoi se kanë mjaftueshëm mbrojtës për ta zëvendësuar kapitenin.
