Drejtori i Shkollës “Abaz Ajeti”, Arsim Bejtullahu mbështet idenë e rektorit Dërmaku që “Shkolla e Bujqësisë” t’i jepen në shfrytëzim UKZ-së
Pas një periudhe të gjatë zvarritjesh për lokacionin e kampusit të Universitetit “Kadri Zeka” në Gjilan, kohë më parë është gjetur një zgjidhje, me vendim të Kuvendit Komunal të Gjilanit, gjegjësisht këshilltarëve të subjekteve të përfaqësura, të cilët kanë miratuar kërkesën e rektoratit të UKZ-së për zgjerimin e hapësirave të kampusit të Universitetit, conform me standardet bashkëkohore ndërkombëtare, shkruan TV Gjilani.
Lidhur me këtë cështje, rektori Dërmaku ka potencuar domosdonë e zgjerimit të hapësirave edhe në një lokacion tjetër në periferi, gjegjësisht në Ish-Shkollën e Bujqësisë dhe objektin e “Fshatit të Lumtur”.
“Janë dy hapësira të pashfrytëzuara prej vitesh në Gjilan: “Fshati i lumtur” dhe “Shkolla e Bujqësisë”, të cilat ka vite që nuk shfrytëzohen. Askush nuk është aty. – Kam kërkuar nga kryetari i Komunës dhe asambleistët që t’i jepen Universitetit të Gjilanit “Kadri Zeka”, pasi nuk po shfrytëzohen? – Ato dy hapësira mund të ndërlidhen sepse janë shumë afër njëra-tjetrës”, ka theksuar rektori Dërmaku në një prononcim medial.
Ai më tej ka shtuar se institucioni që drejton, Universiteti “Kadri Zeka” mëton të zgjerohet me programe të reja dhe atraktive për të rinjtë, prandaj i duhen hapësira adekuate alternative.
“Ne kemi ide dhe dëshirë që të zhvillohemi si Universitet dhe të profilizohemi me programe të ndryshme, të cilat nuk i kanë universitetet tjera… P.sh. dëshirojmë të zgjerohemi me programe, si: Mjekësi Sportive, Fizoterapi, Programe Sociale, Teknologji Ushqimor etj. Për të gjitha këto nevojiten hapësira. Dhe do të ishte ideale të bëhet një kombinim i të dy hapësirave atje”, ka theksuar më tej rektori dërmaku, duke nënvizuar se UKZ do të bëhej universiteti me kampusin më të madh pasi atje janë edhe ndërtesat të përfunduara.
Rektori Dermaku më tej ka theksuar se nuk dëshiron që Universiteti të bëhet pronë e përhershme por ka kërkuar që t’i jepen UKZ-sw nw shfrytëzim, ndërsa potencoi se kjo kërkesë ka hasur në “vesh të shurdhër” nga asambleistët, anipse sipas tij, dihet mirëfilli se do të ishte ideale për të gjithë qytetarët e Anamoravës. Ai ka shtuar e konstatuar se po të realizohej kjo ide aty do të bëheshin edhe investime.
E lidhur me këtë daklaratë të rektorit Dërmaku ka reaguar drejtori i Shkollës së Mesme të Ultë “Abaz Ajeti”, Prof. Arsim Bejtullahu.
Ai ka theksuar për TV Gjilani se e vlerëson tejet pozitive idenë e rektorit Dërmaku, duke i konsideruar shumë pozitive funksionalizimet eventuale të objekteve të potencura në periferi të qytetit të Gjilanit.
“Duke pasur parasysh që objekti i “Shkollës së Agrobiznesit” nuk është funksional për arsye tanimë të njohura nga qytetarët dhe komunitetin arsimor, e konsideroj të arsyeshme deklaratën e rektorit që kjo shkollë t’i jepet në shfrytëzim UKZ-së, që ajo të vëhet në pronësi ose përdorim afatgjatë, si nevojë e domosdoshme për zgjerim”, ka shkruajtur Bejtullahu.
Sipas tij, Universitetet nuk janë vetëm institucione arsimore, por edhe qendra identitare, kulturore dhe zhvillimore për qytetin dhe komunitetin ku veprojnë.
“Rektori ka theksuar rëndësinë e ruajtjes së hapësirës aktuale të universitetit, duke e konsideruar atë pjesë thelbësore të identitetit të institucionit. Unë e përkrah plotësisht këtë qëndrim, duke besuar se hapësira e universitetit duhet të mbetet aty ku është, si themel i vazhdimësisë dhe zhvillimit të tij”, ka vijuar Bejtullahu.
“Kjo do të siguronte një shfrytëzim racional të një infrastrukture me standarde të larta, do të garantonte vazhdimësinë e destinacionit arsimor të objektit dhe do të kontribuonte në forcimin e rolit të universitetit si shtyllë zhvillimore për qytetin e Gjilanit dhe rajonin”, ka nënvizuar në fund drejtori i Shkollës së Mesme të Ultë “Abaz Ajeti”, e cila është gjeografikisht më e afërta me obkektet e lartpërmendura, dhe se do të ishte mbase interes reciprok për thellimin e bashkëpunimit të një të ardhme të sigurtë të arsimit në përgjithësi, vecmas për nxënësit e kësja pjese të qytetit, të cilët do të mund të shkëmbenin përvoja të jashtëzakonshme të mësimit Dual, paralelisht me studentët e programe të reja të të së ardhme së këtij universiteti. Xh. V. /TV Gjilani/
