Gjilan: Katër karatistë të Klubit të Karatesë “AS” përfaqësojnë Kosovën në Kampionatin Ballkanik në Tivar të Malit të Zi
Katër karatistë nga Klubi i Karatesë “AS” do të marrin pjesë në Kampionatin Ballkanik i cili do të mbahet në Tivar të Malit të Zi më 30 maj e 1 qershor 2025 .
Në mesin e emrave të dëshmuar të karatesë së Kosovës, pjesë e ekipit përfaqësues do të jenë edhe Daris Rahimi, Bora Gagica (KATA&KUMITE); Alea Ajeti, (KATA&KUMITE), si dhe Xhan Ilijazi, KATA&KUMITE, kategorinë deri në 45 kilogramë. Të gjithë këta do të udhëhiqen nga trajneri Alban Beqiri.
Në Kampionatin Ballkanik, Federata e Karatesë së Kosovës do të marrë pjesë me rreth 100 garues.
Ndërsa, bëhet e ditur se konkurrenca do të jetë jashtëzakonisht e fortë pasi kanë paralajmëruar pjesëmarrje 12 shtete, derisa rreth 1 mijë garues në disciplina dhe kategori të ndryshme të të dy gjinive do të sfidohen skajshmërisht.
Lajmin e ka bërë të ditur Alban Beqiri, trajner i KK “AS”, i cili njëherit është Drejtor Sportiv i Federatës së Karatesë së Kosovës.
“Unë pres rezultate të mira duke pasur parasysh që në edicionin e vitit të kaluar 2023/2024, Kosova ka shënuar rezultate pozitive. Edhe në këtë edicion shpresoj që ato rezultatet t’i përsërisim, madje besoj se do të kemi rezultate akoma më të mira”, ka thënë Beqiri për TV Gjilani.
Vlen të theksohet se Klubi i Karatesë “AS” në vazhdimësi ka shënuar rezultate impresive, duke u stolisur për vite me radhë me tituj të kampionit në Kosovës, qoftë në gara individuale apo ekipore.
Ndër emrat më të shquar të klubit, të cilët kanë lënë gjurmë të pashlyeshme në gara e aktivitete të ndryshme, si në rrafshin vendor ashtu edhe atë ndërkombëtar, janë me sa vijon: Erina Sherifi – dy herë medaliste, njëherit kampione ballkanike (2024); Hatixhe Zejnullahu – medaliste botërore në gara ekipore, si pjesë e ekipit kombëtar në kategorinë e senioreve, si dhe shumë rezultate tjera të karatistëve tjerë, të shënuara në gara të ndryshme për nga niveli e karakteri garues.
