Armando Duka uron Igli Tare për emërimin Drejtor Sportiv te FC Milan
Kreu u Federatës Shqiptare të Futbollit, Armando Duka, ka uruar ish futbollistin e kombëtares, Igli Tare, për emërimin e këtij të fundit në pozitën: “Drejtor Sportiv” i FC Milan.
Duka potencoi se ky vendim i klubit ishte i pritur në funksion të avancimit të mëtejmë të potencialeve të skuadrës së madhe italiane.
“Urime Igli! Emërimi yt si Drejtor Sportiv i klubit të Milanit, është një arritje vërtetë e rëndësishme. Besoj fort se profesionalizmi, përkushtimi dhe vizioni yt do ta ndihmojnë këtë klub legjendar të rikthehet në nivelet që i takojnë, ashtu si në kohët e lavdishme të historisë së tij”, shkroi fillimisht Duka.
I pari i Federatës Shqiptare të Futbollit, vuri në dukje më tej edhe cilësitë e Igli Tare në pozitën e njejtë te skuadra e Lacios, për c’gjë tha se ai ka qenë shembull me vizionin e tij te Lazio.
“Ti ke dëshmuar më parë te Lazio, ku për vite me radhë ke ndërtuar me sukses një projekt të qëndrueshëm dhe konkurrues në arenën ndërkombëtare. Tani të pret një tjetër sfidë e madhe, por jam i bindur se do t’ia dalësh edhe këtë herë, me të njëjtën maturi dhe pasion për lojën”, përundoi Duka urimin e tij.
