LDK dega Gjilan, vitin 2025 e quan vit të mashtrimit të madh të ekzekutivit
Në një postim publik në faqen e saj, dega e LDK-së në Gjilan është shprehur e ashpër ndaj qeverisjes komunale, duke iu referuar një postimi paraprak të kryetarit Hyseni.
“Ka filluar me 18 janar të këtij viti të ‘punojë’ duke tentuar ta nëpërkëmbë dinjitetin e LDK-së me bllokimin e sallës së sporteve dhe me mashtrimin se akademinë përkujtimore për presidentin Rugova e bën dikush tjetër”, shkrun vec tjerash faqja zyrtare e degës së LDK-së.
Po aty faqja i referohet një postimi paraprak të kreut të Komunës së Gjilanit Alban Hyseni, i cili ka nënvizuar duke theksuar se “viti 2025, do të jetë vit të kthimit të dinjitetit të qytetarëve”.
POSTIMI I PLOTË:
Vit i vazhdimit të mashtrimit të madh nga ekzekutivi i Gjilanit
I pari i ekzekutivit në Gjilan, z. Hyseni, paska vlerësuar 2025-tën si “vit të kthimit të dinjitetit të qytetarëve”. Tash edhe publikisht e paska pranuar që për tri vite e ka nëpërkëmbur dinjitetin e çdo qytetari në Gjilan dhe duket se hiç marre nuk i vjen.
Ka filluar me 18 janar të këtij viti të ‘punojë’ duke tentuar ta nëpërkëmbë dinjitetin e LDK-së me bllokimin e sallës së sporteve dhe me mashtrimin se akademinë përkujtimore për presidentin Rugova e bën dikush tjetër.
Për Lidhjen Demokratike të Kosovës- Dega në Gjilan, është mandat i humbur dhe vit i vazhdimit të mashtrimit të madh. Por, edhe kjo përfundon në tetor të po këtij viti, për rikthimin e dinjitetit të Gjilanit.
