LDK në Gjilan kundërshton projektin në Bulevardin “Ibrahim Rugova”, kërkon transparencë dhe debat publik
Këshilltarët komunalë të LDK-së në Gjilan kanë reaguar ndaj projektit që, sipas tyre, po planifikohet të realizohet në Bulevardin “Ibrahim Rugova”, duke shprehur kundërshtimin për mënyrën se si po procedohet me këtë investim.
Në reagimin e tyre publik, ata pretendojnë se projekti po shtyhet përpara pa informim të qytetarëve, pa konsultime publike, pa debat profesional dhe pa dëgjim publik, ndonëse, sipas tyre, bëhet fjalë për një investim me ndikim të drejtpërdrejtë në një nga segmentet kryesore të qytetit.
LDK-ja vlerëson se projekti do ta rëndojë edhe më tej qarkullimin në Bulevardin “Ibrahim Rugova” dhe shpreh shqetësimin se mungojnë analizat për trafikun, zhvillimin urban dhe interesin publik.
Po ashtu, këshilltarët komunalë të kësaj partie pretendojnë se projekti nuk është i përfshirë në planin urbanistik dhe as në planin zhvillimor të qytetit, duke kërkuar transparencë lidhur me vendimmarrjen dhe bazën mbi të cilën po procedohet.
Në reagim thuhet se prioritet duhet t’u jepet projekteve të tjera infrastrukturore, të cilat, sipas LDK-së, kanë mbetur të parealizuara, ndërsa i bëhet thirrje organeve kompetente që të merren me këtë çështje.
Këshilltarët komunalë të LDK-së kërkojnë sqarime publike se kush e ka marrë vendimin për realizimin e projektit dhe mbi çfarë baze është planifikuar ndërhyrja në këtë pjesë të qytetit.
TV Gjilani mbetet i hapur për qëndrimin e Komunës së Gjilanit dhe palëve të tjera të përfshira lidhur me këtë çështje.
