Në Sarajevë ua preu shkurt se NATO “nuk lejon vakuum sigurie”, nesër në Prishtinë: Çka pritet nga vizita e Rutte-s?
Fillim e fund të tregimit NATO-ja e ka stabilitetin: që i mbivendoset çfarëdo konsiderateje.
Me këtë konkluzion që e kanë edhe premisë, sot Sekretari Gjeneral i NATO-s, Mark Rutte, qëndroi në Sarajevë i shoqëruar nga ambasadorë të Aleancës së Atlantikut të Veriut – nga ku nesër niset për Prishtinë për t’u takuar me krerë të vendit dhe hisedarët ndërkombëtar të sigurisë në vend.
Në Sarajevë shefi i organizatës më të madhe të sigurisë perëndimore la disa porosi kyçe para presidencës trepalëshe atje: asaj boshnjake, kroate dhe serbe – për çka këta të fundit qëndrojnë në radarin e destabilizuesve – kohëve të fundit me veprime të ashpërsuara secesioniste nga lideri ulranacionalist, Milorad Dodik.
Nuk lejojmë rrezikimin e paqes së arritur me aq vështirësi, NATO dhe EUFOR nuk do të lejojë krijimin e ndonjë vakumi të sigurisë, Mbështesim Zyrën e Përfaqësuesit të Lartë (mbikëqyrësit të zbatimti të Marrëveshjes së Dejtonit). Këto ishin tre mesazhet kyçe – si rrjedhojë e tensioneve që përkthehen në to – që Rutte i lëshoi prerazi në drejtim të entitetit serb të Bosnje-Hercegovinës, “Republika Srpska”-s.
Nesër në Prishtinë…
Albin Kurtin, Vjosa Osmanin, komandantin e KFOR-it, Enrico Barduanin, dhe drejtorin e NALT-ës, Gjeneralin Nawrat – i ka në agjendë për t’i takuar, Mark Rute.
Vizita e Rutte-s në Kosovë vjen në një kohë kur siguria në veri është e qetë “por, e brishtë” siç e formulojnë autoritetet finale të sigurisë, ato të KFOR-it – të cilët edhe kanë katërfishuar tash e një kohë patrolliet në kufirin e gjatë Kosovë – Serbi.
Përshkallëzimi i fundit i sigurisë ishte sulmi terrorist në infrastrukturën vitale ujore – atë të Ibër Lepencit – për çka autoritetet kosovare autorësinë e gjurmojnë deri te shteti serb, shërbimet e saj, dhe me urdhërdhënës Milan Radojçiq.
Në konferencën e fundit për shtyp nga Albin Kurti, ky sulm “ishte i pesëmbëdhejti me radhë” nga qershori 2024 ndërsa paralajmëronte sulmte të reja gjatë kohës së vitit të ri.
Por, Kosova e gjen veten në marrëdhënie jo fort të relaksuara me ombrellën ndërkombëtare të sigurisë së vendit të vet – ku, në deklarime të shumta publike, edhe nga (tash ish) zyrtarë të lartë të DASh, por edhe ish-komandantë të KFOR-it, është njoftuar për një hendek të madh në marrëdhënie.
Kjo si pasojë e një kursi të ngurtë të ndjekur nga qeveria e Albin Kurtit, e cila përkthehet në sovranitetit-me-çdo-kusht dhe një zbatim mekanicist i sundimit të ligjit që i mbivendoset shqetësimeve të sigurisë, sipas hisedarëve.
Madje edhe në kontekst zgjedhor, NATO-ja dërgoi 200 trupa shtesë të këmbësorisë italiane në dritën e shqetësimeve për përshkallëzim eventual të gjendjes së sigurisë.
Për ish-Kryeinspektorin e Agjencionit Kosovar për Inteligjencë, Burim Ramadanin, mesazhet që do të artikulojë Rutte në vizitën e tij në Kosovë do të duhet “të analizohen në detaje”
“Vizita e Ruttes ne Bosnje dhe Kosovë dëshmon për përkushtimin e NATOs në Ballkan, por edhe shqetësimin e tyre për sigurinë në Ballkan. Mesazhi i Ruttes bashkë me anëtarët e NAC (Këshillit Veri-Atlantik) është në kohë të veçantë. Mesazhet që mund të dalin nfa kjo vizitë, duhet të analizohen në detaje”, tha Ramadani në një përgjigje me shkrim për Nacionale.
Sekretari Gejeneral i NATO-s, Mark Rutte, nesër do të mbajë konferencë për shtyp të përbashkët me Presidenten e Kosovës, Vjosa Osmanin.
