Bajrami: Le të rinumërohet secila votë, s’duhet të frikësohet askush – në burg ata që kanë tentuar të devijojnë vullnetin e qytetarëve

Deputetja e Lidhjes Demokratike të Kosovës, Hykmete Bajrami ka thënë se të gjitha votat mund të rinumërohen dhe se askush s’duhet të ketë frikë nga kjo gjë.

Bajrami thotë se dyshimet për votat duhet të zbardhen. Sipas saj, për LDK-në kushdo që ka tentuar ta devijojë vullnetin e qytetarëve, e ka vendin në burg.

“Le të rinumërohet secila votë, le të hetohet secili dyshim, le të verifikohet çdo gjë. Ne kemi institucione të thirrura për këtë punë, andaj askush nuk duhet të frikësohet nga rinumërimi dhe hetimi.

Çdo dyshim duhet të zbardhet me shpejtësi dhe vendosmëri, pasi që vetëm kështu forcohet besimi dhe integriteti i procesit zgjedhor”.

“Për LDK-në vullneti i qytetarëve është i shenjtë dhe kushdo që ka tentuar ta devijojë atë, vendin e ka në burg. Të gjithë jemi të barabartë para ligjit”, shkruan Bajrami.

“Secili anëtar, secili përkrahës, secili votues duhet të angazhohet për të mbrojtë vlerat e LDK-së dhe për ta rikthyer atë si forcën e parë politike, në shërbim të të gjithë qytetarëve të vendit. Demokraci”, shkruan deputetja e LDK-së, Hykmete Bajrami.