U hap ekspozita individuale e Jetullah Halitit – Eti me titull “Kur flet arti nderohet kombi dhe atdheu”
Në Galerinë e Arteve në Gjilan është hapur ekspozita personale e Jetullah Halitit – Eti me titull “Kur flet arti nderohet kombi dhe atdheu”.
Kushtrim Zeqiri, drejtor i Drejtorisë për Kulturë, Rini dhe Sport në Gjilan në hapje të ekspozitës përgëzoi autorin për punën e tij, për të cilin tha se çdo vit po na sjell punime të reja, dhe se ky është viti i tretë që ai mbanë ekspozitë personale në Gjilan.
Në ceremoninë hapëse të ekspozitës janë lexuar dy telegrame të dërguara, njëri nga Mark Zadeja në emër të Galerisë Evropiane të Arteve dhe tjetra nga Arbër Ahmetaj, me vlerësime të çmuara për krijimtarinë e autorit Jetullah Halitit – Eti.
Nikoqiri i kësaj ngjarje Jetullah Haliti – Eti, pasi ka përshëndetur të pranishmit, ka theksuar se komuna po i përkrah artistët. Ai i ka ftuar artdashësit që të dialogojnë me veprat artistike, pa dashur t’i bëjë një rikapitulim krijimtarisë së tij, duke potencuar se ajo duhet të komunikojë vetvetiu me artdashësit.
