Ballkani merr vendim për Ilir Dajën, ia zgjat kontratën deri më 2026
Kampioni i Kosovës në futboll, Ballkani ka njoftuar se ka zgjatur marrëveshjen me trajnerin shqiptar Ilir Daja, deri në vitin 2026.
Ballkani nuk është duke kaluar në momentet më të mira xhirot e fundit, duke zgjuar kështu zërat për një largim të mundshëm të teknikut shqiptar, mirëpo klubi tashmë ka bërë të ditur marrëveshjen e re.
“Zonja dhe zotrinjë, tifozë të kampionit të Kosovës, me kënaqësinë më të madhe ju njoftojmë se me maestron e fushës së blertë, me profesorin e nderuar, Ilir Daja, kemi vazhduar deri në vitin 2026. Bashkë kemi nisur t’u shkruajmë faqet e historisë së futbollit tonë, bashkë do t’i vazhdojmë”, thuhet në njoftimin e klubit.
Në 10 xhirot e fundit Ballkani ka vetëm dy fitore. Ata ndodhen në pozitën e parë në tabelën e Superligës, me një pikë më shumë se Llapi që mban pozitën e dytë, e dy më shumë se Drita që ndodhet në pozitën e tretë.
