Blinken uron Kosovën: Zbatoni zotimet dhe ecni përpara përmes dialogut të lehtësuar nga BE-ja
Sekretari Amerikan i Shtetit, Antony Blinken, e ka uruar Kosovën me rastin e përvjetorit të 16-të të pavarësisë.
Ai ka thënë se SHBA e vlerëson partneritetin e qëndrueshëm të rrënjosur në mirëkuptimin reciprok, vlerat e përbashkëta dhe miqësinë mes dy popujve.
Sekretari Amerikan i Shtetit ka thënë se SHBA e inkurajon Kosovën që të zbatojë zotimet e saj dhe të ecë përpara përmes dialogut të lehtësuar nga Bashkimi Evropian për të arritur një marrëveshje reciproke të normalizimit me Serbinë, në rrugën drejt njohjes përfundimtare reciproke.
“Ndërsa vazhdoni të bëni përparim në forcimin e institucioneve demokratike dhe promovimin e sundimit të ligjit, ne do të vazhdojmë të mbështesim një Kosovë multietnike që avancon një rajon më të sigurt dhe më të begatë. Shtetet e Bashkuara inkurajojnë Kosovën që të zbatojë zotimet e saj dhe të ecë përpara përmes dialogut të lehtësuar nga BE-ja për të arritur një marrëveshje gjithëpërfshirëse të normalizimit me Serbinë, në rrugën drejt njohjes së ndërsjellë në fund”, ka shkruar Blinken në urim.
Blinken ka theksuar tutje se SHBA-ja beson në të ardhmen e Kosovës në institucionet euroatlantike.
Ndërsa, ka shtuar se mbështet aspiratat e përcaktuara sipas Deklaratës së Pavarësisë dhe Kushtetutës për të “kontribuuar në stabilitetin e rajonit dhe Evropës duke krijuar marrëdhënie të mira fqinjësore”.
“Urime mikut, partnerit dhe aleatit tonë përvjetorin e Pavarësisë”, thuhet në fund.
