Ballkani sot përballet me favoritin e Grupit C – synon rezultat pozitiv
Ballkani vazhdon sot (e enjte) rrugëtimin në fazën e grupeve të Ligës së Konferencës, për t’u përballur në raundin e dytë me Dinamo Zagrebin.
Ndeshja që fillon në ora 18:45 do të zhvillohet në stadiumin “Fadil Vokrri”.
Kampioni i Kosovës është ende pa pikë, pasi ndeshjen e parë e humbi ndaj Vitoria Plzenit me rezultat minimal 1-0.
Në anën tjetër, Dinamo triumfoi lehtësisht ndaj Astanas, duke e mposhtur 5-1.
Por, skuadra kroate për këtë takim ka shumë mungesa, andaj edhe Ballkani ka shanse të mira që sonte të marrë së paku një pikë.
Do të jetë një ndeshje e vështirë në letër, mirëpo trajneri Ilir Daja ka thënë se ata janë përgatitur maksimalisht për këtë duel dhe do të synojnë rezultatin pozitiv.
Blutë mundën Astanën me rezultat 5-1 në ndeshjen e parë, ndërsa skuadra nga Suhareka ia vështirësoi Viktorija Plzenit fitoren minimale 1-0.
Kujtojmë që kampioni kroat vjen në Prishtinë me shumë probleme. Blutë humbën ndaj Hajdukut në një derbi të madh të dielën dhe duket qartë se janë të tronditur mendërisht, por trajneri i Dinamos Sergej Jakiroviç ka probleme shumë më të mëdha për sa i përket stafeve të lojës.
