Hoti flet për raportin e Bankës Botërore -pse s’do të përsëritet rritja dyshifrore ekonomike?
Rritja ekonomike mbi 10 për qind e ekonomisë së Kosovës në vitin 2021 po rezulton të jetë rezultat i faktorëve të jashtëm e jo i politikave qeveritare, sipas deputetit të LDK-së, Avdullah Hotit.
Ai në një prononcim për Gazetën Express ka treguar se pse nuk mund të ketë rritje ekonomike të ngjashme me atë të vitit 2021. Së fundmi, Banka Botërore ka publikuar një raport ku tregohet se për vitin 2023 rritja ekonomike nuk do të jetë më e lartë se 3.7 për qind.
Numrat kanë qenë shkas i përplasjeve në mes qeverisë dhe opozitës. Në një anë qeveria pretendonte për performancë të jashtëzakonshme ekonomike e në anën tjetër opozita thoshte se të dhënat janë nominale dhe si të tilla po manipulohen nga ekzekutivi.
Banka Botërore (BB), më 6 prill ka publikuar raportin për Kosovën ku rritja ekonomike për vitin 2022 nënvizohet të ketë qenë 3.5 për qind, ndwrsa për këtë vit pritet një ngritje modeste e ekonomisë që mund të shkojë deri në 3.7 për qind.
