Punëtorët e Administratës Komunale në Gjilan që agjërojnë, 7 orë punë në ditë gjatë Muajit të Shenjtë të Ramazanit
Komuna e Gjilanit, gjegjësisht Zyra e Kryetarit të Komunës Alban Hyseni, ka vazhduar me praktikën e vitit paraprak, për të krijuar lehtësira për zyrtarët komunal të administratës që agjërojnë gjatë Muajit të Shenjtë të Ramazanit.
Lexo edhe: Konkurs për plotësimin e vendeve të lira të punës në shëndetësi
Kështu ka njoftuar Besart Selimi nga Kabineti i Kryetarit të Komunës, për TV Gjilani.
“Kryetari i Komunës ka marrë vendim që të gjithë ata që agjërojnë gjatë muajit të Ramazanit të fillojnë punën nga ora 09:00h, pra një orë më vonë se zakonisht”, ka thënë ai.
Sipas z. Selimi, ky vendim është marrë në funksion të krijimit të lehtësirave të zyrtarëve që agjërojnë Ramazanin, dhe si e tillë është praktikuar edhe gjatë vitit të kaluar.
“Nuk është ndryshim i orarit por vetëm lehtësim për një orë, duke e pasur parasysh vështirësitë e agjerimit, si dhe orarit të hershëm të syfyrit”, ka shtuar ai.
Sipas z. Selimi, një praktikë e tillë është aplikuar edhe në muajin e Ramazanit të vitit të kaluar, dhe si i tillë aplikohet me lehtësira të ndryshme edhe nëpër institucione tjera./Tv Gjilani/
