Zarë –Arbanas, promovohet vepra “Arbneshi nuk harrohet II”, e autorit Sylejman Morina
Me ftesë të kryetares së Shoqatës Kulturore – Artistike ”Vicko Zmajeviq”, Dr. sc. Maksimiliana Barançiq, ishte i ftuar për promovimin e veprës së dytë “Arbneshi nuk harrohet II”, më, 08 qershor 2023 në Zarë –Arbanas (Arbnesh), autori Sylejman Morina nga Dardana.
Po e njëjta shoqatë kulturore e arbneshëve e kishte organizuar edhe promovimin e veprës së parë me të njëjtin titull më 2018. Poashtu edhe promovimi i veprës së dytë u bë në sallën e kësaj shoqate, ku të pranishëm ishin dashamirët e fjalës së shkuar, prof. universiteti, biznesmen, aktivist të shoqatës dhe arbneshë të tjerë.
Në pika të shkurta për veprimtarinë e autorit foli, prof. Maksimiliana, ndërsa për veprën me fjalë rasti u paraqit, Prof. dr. Isak Shema.
“Arbneshët janë shkruar në vijimësi nga autorët e ndryshëm kosovarë e të tjerë, mirëpo çasja që i bënë autori Sylejman Morina është diçka e veçantë. Ai duke pasur kontakte të gjata me arbneshët dhe falë miqësive të krijuara me ta, iu kishte mundësuar të ketë informacione dhe njohuri të shumta për bashkësinë e arbneshëve. Lexuesit shqiptar i ka ofruar shumë informacione rreth personaliteteve të njohura dhe ka ofruar pikëpamjet e tyre për shumë çështje lidhur me arbneshët, të cilat i ka botuar në Kosovë, Shqipëri, Mal të Zi e diasporë. Si: Prof. Aleksander Stipçeviqin, akademikët Pavle Deshpali, Hrvoje Mazija, Mr.Ivica Mateshiq, dr.sc. Maksimilana Barançiq, dr.sc. Rozana Petani, dr.sc. Valter Tomas. Mr.Mirta Tomas, dr.sc. Sergjo Dokoza, Bernard Kotllar, Josip Gjergja etj. Shumë emra u bën të njohur në saje të publikimeve për herë të parë nga Sylejman Morina, pra me të drejtë prof. Stipçeviqi shkruante: “Duke iu falënderuar juve, disa arbneshë janë bërë të njohur edhe në Shqipëri. Ju falënderoj. I juaji Aleksandar Stipçeviq” (më: 17. 04.2010), tha Shema.
“Morina i përcjell zhvillimet kulturore në Arbanas, aktivitetet e shoqatave kulturore si dhe aktivitetet e shqiptarëve të Zarës, përgjithësisht. Për veprën “Arbanasi nuk Harrohet II” arbneshët u treguan shumë të interesuar që ta kenë në bibliotekat e tyre. Sipas mendimit tim, punimeve iu ka munguar që ta kenë një rezyme në gjuhen kroate, megjithëse një veprim i mirë ishte që pasthënia e librit ishte në gjuhën kroate. Autori në të ardhmen do të na sjellë materiale interesante nga Arbanasi dhe jeta e arbneshëve”shtoi dr. Isak shema në fjalën e tij.
Pas fjalës së profesorit të nderuar, të pranishmëve iu drejtua autori Sylejman Morina, i cili pos tjerash tha: “Motivi që të merrem me këtë çështje me vite të tëra, buron nga veprat e shkrimtarëve arbneshë, dhe nga vizitat e përhershme në Arbanas (Arbnesh). Atyre iu përkujtoi disa kujtime nga gjeneratat e vjetra të arbneshëve të cilët i kishin rrëfyer në besim, në kohen e komunizmit, siç kishte qenë jeta e izoluar e me plotë ngjarje të hidhura e frikë. Arbneshët si pjesë e shkëputur nga trungu arbnor, gati 300 vjet, me krenari e thonë se janë arbneshë, edhe pse pak veta flasin arbnishten. Mirëpo, shpirtrat e tyre janë çliruar të shprehin pa frikë atë që e ndiejnë: të ndjekin kurset në arbnishte, të mendojnë lirshëm, t’i mirëpresin në vizita personalitet nga trojet shqiptare, siç ishte rasti me presidentët Meta e Begaj dhe përfaqësues nga Kosova, krejt kjo falë vlerave të demokracisë në Republikën e Kroacisë”, ka thënë Morina.
