Xi Jinping-u uron për nisjen e Vitit të Shkëmbimeve Njerëzore Kinë-Afrikë 2026
Presidenti kinez Xi Jinping dërgoi të enjten një letër urimi për ceremoninë e hapjes së Vitit të Shkëmbimeve Njerëzore Kinë-Afrikë 2026.
Në letrën e tij, Xi Jinping-u tha se organizimi i vitit të shkëmbimeve njerëzore me rastin e 70-vjetorit të marrëdhënieve diplomatike midis Kinës dhe Afrikës është një konsensus i rëndësishëm i arritur nga udhëheqësit e të dy palëve dhe shënon një hap të rëndësishëm për të forcuar më tej mbështetjen publike për miqësinë kino-afrikane në një pikënisje të re historike.
Të rinj afrikanë luajnë sporte karakteristike lokale në qytetin Jinhua të provincës Zhejiang të Kinës lindore, 23 maj 2024. /VCG
Shkëmbimet dhe mësimi i ndërsjellë midis qytetërimeve përbëjnë një forcë të pashtershme nxitëse për përparimin e qytetërimit njerëzor, si dhe për paqen e zhvillimin botëror, tha Xi, duke vënë në dukje se dy qytetërimet e mëdha të Kinës dhe Afrikës e kanë pasuruar njëri-tjetrin për mijëra vjet, duke shërbyer si burimi historik dhe intelektual i miqësisë ndërmjet Kinës e Afrikës.
Ai i nxiti të dy palët ta shfrytëzojnë vitin e shkëmbimeve njerëzore si një mundësi për të vazhduar miqësinë tradicionale, për të forcuar mësimin e ndërsjellë ndërmjet qytetërimeve, për të zgjeruar shkëmbimet njerëzore, veçanërisht midis të rinjve, për të thelluar shkëmbimet e përvojës në qeverisje dhe për të çuar së bashku përpara modernizimin.
Nëpërmjet këtyre përpjekjeve, tha Xi, të dy palët mund të nxisin lidhje më të ngushta midis më shumë se 2.8 miliardë banorëve të Kinës e Afrikës, duke bashkuar zemrat, mendjet e forcat e tyre dhe duke dhënë kontribut të ri në solidaritetin e Jugut Global për trajtimin e sfidave globale, nxitjen e vlerave të përbashkëta dhe ndërtimin e bashkësisë me të ardhme të përbashkët të njerëzimit.
