Haxhiu: Shpallet konkursi për një anëtar joprokuror të KPK-së, reforma në Këshillin Prokurorial është jetike
Kryetarja e Kuvendit të Kosovës, Albulena Haxhiu, ka njoftuar pas mbledhjes së Komisionit të Posaçëm për Administrimin e Procesit të Përzgjedhjes së Anëtarëve Joprokurorë të Këshillit Prokurorial se është shqyrtuar dhe shpallur konkursi për zgjedhjen e një anëtari joprokuror të KPK-së.
Sipas saj, ky hap vjen në kuadër të përmbushjes së obligimeve që dalin nga reforma në Këshillin Prokurorial.
“Në përmbushje të obligimeve që dalin nga reforma në Këshillin Prokurorial, sot, pa vonesë, kemi shpallur thirrjen për zgjedhjen e një anëtari joprokuror në këtë Këshill”, ka shkruar Haxhiu.
Ajo ka theksuar se zbatimi i reformës në Këshillin Prokurorial është thelbësor për forcimin e sundimit të ligjit në vend.
“Zbatimi i reformës në Këshillin Prokurorial është jetik për forcimin e sundimit të ligjit dhe për rikthimin e besimit të qytetarëve në sistemin e drejtësisë”, është shprehur ajo.
Haxhiu ka shtuar se përkushtimi për reforma të thella dhe të qëndrueshme do të vazhdojë.
“Përkushtimi ynë për reforma të thella dhe të qëndrueshme vazhdon sepse sundimi i ligjit kërkon angazhim të përhershëm ndaj qytetarëve dhe shtetit tonë”, ka theksuar ajo.
