Osmani pranon letrat kredenciale të ambasadores së Kosta Rikës – thekson rëndësinë e heqjes së ndërsjellë të vizave
Presidentja Vjosa Osmani ka pranuar letrat kredenciale të ambasadores së re të Kosta Rikës në Kosovë, Olga M. Sauma Uribe.
Me këtë rast, e para e shtetit e ka ngritur çështjen e heqjes së ndërsjellë të vizave, duke thënë se kjo do të forconte bashkëpunimin mes qytetarëve e bizneseve si dhe do të thellonte marrëdhëniet dypalëshe.
Presidenca e Republikës së Kosovës ka njoftuar se Osmani i ka uruar mirëseardhje ambasadores dhe e ka përgëzuar për emërimin.
Osmani ka shprehur bindjen se mandati i ambasadores do të kontribuojë në thellimin e marrëdhënieve mes dy vendeve.
“Presidentja shprehu mirënjohje për mbështetjen e hershme dhe parimore të Kosta Rikës për pavarësinë dhe sovranitetin e Republikës së Kosovës, duke theksuar potencialin për zgjerimin e bashkëpunimit dypalësh”- thuhet në këtë komunikatë për media.
Vjosa Osmani ka vënë në pah se Kosova vlerëson marrëdhëniet miqësore me shtetet e Amerikës Latine dhe mbetet e përkushtuar për forcimin e bashkëpunimit me vendet e këtij rajoni.
Në takimin Osmani-Uribe u fol për mundësi të bashkëpunimit në diplomaci, ekonomi dhe turizëm.
Kosta Rika është vendi i parë që ka njohur zyrtarisht pavarësinë e Republikës së Kosovës.
