Haxhiu nga Bondsteel: SHBA ka qenë pranë Kosovës në momentet më përcaktuese të historisë sonë
Ushtruesja e detyrës së Presidentes së Kosovës, Albulena Haxhiu, ka marrë pjesë në ceremoninë e shënimit të Ditës së Pavarësisë së Shteteve të Bashkuara të Amerikës, të mbajtur në Kampin Bondsteel, ku është shënuar edhe 250-vjetori i Pavarësisë së SHBA-së.
Haxhiu, së bashku me pjesëtarë të Grupit për Mbështetje në Ballkan, uroi ushtarët dhe qytetarët amerikanë, duke theksuar rëndësinë e kësaj dite si simbol i vlerave demokratike.
“Sot, në Ditën e Pavarësisë së Shteteve të Bashkuara të Amerikës, pata kënaqësinë të jem në Kampin Bondsteel… Katër korriku na kthen te një nga parimet më fisnike të demokracisë, te vullneti i popullit si burim i lirisë dhe pushtetit”, u shpreh ajo.
Ajo theksoi se për Kosovën, 4 Korriku lidhet ngushtë me miqësinë dhe aleancën me SHBA-të, të cilat, sipas saj, kanë qenë pranë vendit në momentet më të rëndësishme historike.
“Për ne në Kosovë, kjo datë është e pandashme nga miqësia me Shtetet e Bashkuara… Ushtarëve dhe qytetarëve amerikanë ua përcolla urimet më të përzemërta për 250-vjetorin e Pavarësisë”, shtoi ajo.
Në fund, Haxhiu uroi popullin amerikan: “Gëzuar 4 Korrikun!”.
