VITI: Stuhia dhe breshëri shkaktojnë dëme të mëdha në bujqësi në disa fshatra të Komunës së Vitisë
Një stuhi e fuqishme e shoqëruar me breshër, ka goditur sot pasdite disa lokalitete në komunën e Vitisë dhe përreth, duke shkaktuar dëme të konsiderueshme në bujqësi.
Sipas raportimeve nga terreni, zonat më të prekura janë fshati Radivojcë si dhe pjesë të fshatrave Remnik, Skifteraj, Budrikë e Pozheran.
Breshëri ka dëmtuar rëndë kulturat bujqësore si: grurin, shalqirin, perimet dhe pemët, duke shkaktuar shqetësime të mëdha te fermerët lokal.
Disa fermerë thanë se dëme të tilla do të ndikojnë dukshëm edhe në të ardhurat e tyre sezonale.
“E kemi mbjellë me mund, kemi investuar shumë, dhe për disa minuta gjithçka u shkatërrua! Dëmet janë të mëdha,” tha një fermer nga fshati Skifteraj.
