U mbajtën provimet pranuese për studimet Master në UKZ
Në Universitetin Publik “Kadri Zeka” në Gjilan, sot janë mbajtur provimet pranues për programet e studimeve Master në kuadër të fakulteteve, Fakultetit të Edukimit, Fakultetit Ekonomik dhe Fakultetit të Shkencave Kompjuterike.
Kandidatët konkurruan në programet e Fakultetit të Edukimit/Mësimdhënie në Gjuhë dhe Letërsi Shqipe, Mësimdhënie dhe Kurikula në Arsimin Fillor si dhe në programin Mësimdhënie në Gjuhë Angleze , në programin e Fakultetit Ekonomik/Analiza Ekonomike dhe Politika Zhvillimore dhe në programet e Fakultetit të Shkencave Kompjuterike/Sistemi i Kontrollit dhe Inteligjenca Artificiale si dhe programin E-Qeverisja.
Procesi i testimit është zhvilluar sipas planifikimeve të parapara dhe nën mbikëqyrjen e komisioneve përkatëse, ndërkohë që menaxhmenti i universitetit ka vizituar nga afër ambientet ku po zhvilloheshin provimet, për të siguruar mbarëvajtjen e procesit.
Në emër të Rektorit të Universitetit, Prof. Asoc. Dr. Artan Dermaku, Prorektorja për Mësimdhënie dhe Çështje të Studentëve, Prof. Asoc. Dr. Shpresë Qamili, theksoi rëndësinë e një procesi të drejtë, transparent dhe në përputhje me standardet akademike. “Universiteti ynë është i përkushtuar që të ofrojë një ambient të mirë për studime pasuniversitare dhe të gjithë kandidatët që sot garojnë për vend në programet master, janë pjesë e një procesi që ruan integritetin dhe cilësinë e lartë akademike,” ka thënë Prorektorja Qamili.
Rezultatet e provimit pranues pritet të publikohen brenda afateve të përcaktuara në konkursin zyrtar të shpallur më herët, ndërsa kandidatët e pranuar do të njoftohen për hapat e mëtejshëm të procesit të regjistrimit.
