U MBAJT CEREMONIA E DIPLOMIMIT TË STUDENTËVE TË UKZ-SË
Universiteti Publik “Kadri Zeka” në Gjilan, ka mbajtur sot Ceremoninë e Diplomimit të studentëve që mbetet një nga organizimet më kryesore për nga pesha dhe rëndësia si akademike, por dhe emocionale që kurorëzon mundin dhe dëshirën e rëndësishme dhe të shumëpritur nga studentët .
Në këtë ceremoni kanë marr pjesë Kryeministri i Republikës së Kosovës z. Albin Kurti, Ministrja e MAShTI-it znj. Arbërije Nagavci, Deputetë të Kuvendit të Republikës së Kosovës, Kryetar të Komunave, Familjarë të Atdhetarit Kadri Zeka, përfaqësues të Institucioneve tjera Publike dhe Private, familjarë të të diplomuarve dhe të pranishëm të tjerë.
Fillimisht, studentët e diplomuar të veshur me uniformën solemne, ai i Fakultetit të Edukimit, Fakultetit Juridik, Fakultetit Ekonomik, Fakultetit të Shkencave Kompjuterike dhe Fakultetit të Shkencave Aplikative kanë parakaluar në prani të mysafirëve, për të vazhduar në tribunën kryesore.
Pastaj, po ashtu solemnisht kanë filluar ti zënë vendet e tyre edhe Rektori, Prorektorët, Dekanët e Njësive Akademike dhe Sekretari i Përgjithshëm.
Më pas është bërë intonimi i Himnit të Kosovës dhe Himnit Kombëtar.
Rreth punës, sukseseve, të arriturave dhe sfidat që e kanë përcjellë ose që i ka edhe sot Universiteti Publik “Kadri Zeka”, ka folur Rektori Prof. Asoc. Dr. Artan Dërmaku.
Ai pasi ka përshëndetur të pranishmit, ka uruar studentët dhe ka falënderuar stafin akademik e administrative për punën dhe angazhimin e treguar në fusha të ndryshme në të mirën e Universitetit në përgjithësi. Rektori ka thënë se të diplomuarit janë dëshmi e përkushtimit, punës së palodhshme dhe mbështetjes së familjeve e stafit akademik.
Ndër tjerash Rektori Prof. Asoc. Dr. Artan Dërmaku, ka thënë se Universiteti ynë ka arritur rezultate të rëndësishme, si akreditimi institucional pesëvjeçar, zgjerimi i programeve, forcimi i hulumtimit shkencor dhe bashkëpunimet ndërkombëtare. Por sipas Rektorit, sfida jonë mbetet ndërtimi i kampusit modern dhe rritja e kapaciteteve shkencore e teknologjike.
Rektori theksoi se ky rrugëtim nuk është fundi, por fillimi i një kapitulli të ri. Ai tha se të diplomuarit do të bëhen mësues, inxhinierë, juristë, ekonomistë e liderë të ardhshëm, ndërsa rrënjët e këtij rrugëtimi i kanë pikërisht në Universitetin Publik “Kadri Zeka”. Të diplomuarit, siç u shpreh Rektori, përbëjnë një dritë të re për shoqërinë tonë.
Kryeministri i Republikës së Kosovës z. Albin Kurti uroi studentët e diplomuar të Universitetit Publik “Kadri Zeka”, duke theksuar se ky institucion është bërë vatër e dijes dhe inovacionit në rajon, me standarde të larta akademike dhe po luan rol të rëndësishëm në përgatitjen e gjeneratave të reja.
Kryeministri theksoi se të diplomuarit nuk duhet të ndalen asnjëherë duke lexuar e studiuar, sepse Diploma, të cilën e merrni sot është veçse përmbyllja e një kapitulli e kurrsesi fundi i një libri, që është vetë jeta.
Në emër të kryetarëve të komunave të Anamoravës, ka folur Kryetari i Komunës së Gjilanit z. Alban Hyseni, i cila ka uruar UKZ-në për ceremoninë derisa ju ka dëshiruar studentëve suksese të mëtutjeshme. Kryetari Hyseni ka thënë se ky është vetëm një hap drejt realizimit të ëndrrave dhe ndërtimit të një të ardhmeje më të mirë për Gjilanin dhe Kosovën.
Sopranon Ylberinë Avdyli, nën përcjelljen me piano nga Etrita Hasani, ka interpretuar këngën “O vendi im” dhe këngën “Kroi i fshatit tonë”.
Ndërsa në emër të studentëve të diplomuar, Rinesa Hyseni shprehu gëzimin për përfundimin e studimeve dhe fillimin e një kapitulli të ri të jetës. Ajo vlerësoi përkushtimin dhe mbështetjen e profesorëve e familjeve gjatë këtij rrugëtimi, duke theksuar se Universiteti “Kadri Zeka” ka qenë vendi ku janë rritur dija, miqësitë dhe përvoja të vlefshme. Studentja Hyseni përfundoi duke uruar që të gjithë të diplomuarit të kontribuojnë në profesionet e tyre dhe në ndërtimin e një të ardhmeje më të mirë për shoqërinë dhe vendin.
Më pas, për të motivuar dhe frymëzuar studentët e sapodiplomuar në rrugëtimin e ri që i pret, përvojen e saj e ka ndare Merita Emini, studente alumni e Universitetit Publik “Kadri Zeka”. Ajo tregoi se ky institucion i dha jo vetëm dije, por edhe besim, mbështetje dhe mundësi për zhvillim personal e profesional. Ajo theksoi se suksesi kërkon durim, këmbëngulje dhe guxim për të kapërcyer sfidat, ashtu si në matematikë ku shpesh duhet gjetur qasje të reja. Merita Emini, e diplomuar në vitin 2023 dhe sot profesoreshë e matematikës, u tha studentëve të diplomuar se diploma nuk është fundi, por fillimi i një kapitulli të ri, duke i inkurajuar të mos lejojnë dyshimet t’i ndalojnë, të besojnë në veten dhe të shfrytëzojnë çdo mundësi që u ofrohet.
Fjala e Studentes Alumni znj. Merita Emini
Pastaj Rektori Prof. Asoc. Dr. Artan Dërmaku së bashku me Dekanët e Njësive Akademike ka ndarë diplomat ceremoniale për studentët e diplomuar për secilin Fakultet.
Në shenjë respekti dhe kujtimi, Rektori i Universiteti Publik ‘Kadri Zeka’ ka ndarë diplomë ceremoniale post mortem për studentet tona të dashura, Arbnora Basha dhe Antiana Thaçi. Këto diploma të cilat i kanë pranuar prindërit e tyre, simbolizojnë vlerësimin që universiteti ynë do të mbajë gjithmonë për to.
Krejt në fund u realizua edhe momenti më kryesor, hedhja e kapelave nga studentët e diplomuar.
