Gjilan: Drejtoria e Inspeksionit kërkon largimin e kiosqeve dhe lodrave nga sheshi i qytetit
Drejtoria e Inspeksionit në Gjilan u ka bërë thirrje pronarëve të bizneseve dhe personave fizikë që të largojnë kiosqet, bokset, lodrat dhe objektet e tjera të vendosura në sheshin e qytetit, më së largu deri më 15 mars.
Inspektorët e Shërbimeve Publike nga Drejtoria e Inspeksionit, gjatë paradites së së premtes, kanë vendosur shirita paralajmërues dhe njoftime në të gjitha objektet lëvizëse të vendosura në hapësirat publike të sheshit..
Përmes këtyre njoftimeve, pronarët janë paralajmëruar që t’i largojnë kiosqet, bokset, lodrat dhe pajisjet e tjera deri më 15 mars, në orën 24:00.
Nga Drejtoria e Inspeksionit bëjnë të ditur se në rast se pronarët nuk veprojnë brenda këtij afati, atëherë largimi i tyre do të bëhet nga Komuna, ndërsa shpenzimet do t’u faturohen vetë pronarëve të këtyre objekteve.
