Studentja e UKZ-së Erletë Baliqi përfaqësoi Kosovën në forumin më të madh evropian për demokraci dhe zhvillim rinor “Almedalen 2025” në Suedi
Universiteti Publik “Kadri Zeka” në Gjilan është krenar të ndajë pjesëmarrjen dhe përfaqësimin dinjitoz të Erletë Baliqit, studente e dalluar në UKZ, në ngjarjen më të madhe demokratike dhe rinore në Evropë, “Java e Almedalen”, e cila u zhvillua në Visby të ishullit Gotland, Suedi.
Erletë Baliqi ishte pjesë e delegacionit të Qendrës për Bashkëpunim dhe Rrjetëzim të Organizatave (CCNO), organizatë që përfaqësoi Kosovën në këtë forum, në mesin e tetë shteteve pjesëmarrëse nga Evropa. Pjesëmarrja e saj shënon një arritje të rëndësishme jo vetëm për UKZ-në, por edhe për të gjithë të rinjtë kosovarë që synojnë të jenë pjesë aktive e dialogut dhe vendimmarrjes në nivele ndërkombëtare.
Gjatë këtij festivali, i njohur si platforma më e madhe evropiane për dialog demokratik, Erleta ishte pjesë e panelit tematik “Rinia dhe Demokracia”, ku ndau vizionin dhe perspektivat e të rinjve nga Kosova për të ardhmen demokratike të rajonit dhe Evropës. Në të njëjtin kontekst, ajo diskutoi mbi rolin e të rinjve në fuqizimin e shoqërisë, sfidat me të cilat përballen dhe mundësitë për përfshirje aktive në procese politike dhe zhvillimore.
Erleta tha se, të jesh pjesë e “Javës së Almedalen”’ si përfaqësuese e të rinjve nga Kosova dhe si studente e Universitetit Publik “Kadri Zeka” është nder dhe përgjegjësi. Ajo tha se kjo përvojë i ka dhënë besim se zëri i të rinjve ka peshë dhe mund të sjellë ndryshime të prekshme në shoqëri.
Nndërkohë në një tjetër panel të rëndësishëm, të titulluar “One Europe Whole and Free – The Western Balkans and the European Union”, pjesëmarrës ishin edhe përfaqësues të diplomacisë kosovare, përfshirë Sekretarin e Parë të Ambasadës së Republikës së Kosovës në Suedi, Dren Zeka, i cili theksoi përkushtimin e palëkundur të Kosovës për integrimin euro-atlantik dhe rolin qendror të të rinjve në këtë proces.
Po ashtu, gjatë “Javës së Almedalen”, u zhvilluan edhe dy seminare me rëndësi strategjike në Muzeun e Gotland-it: “Eksplorimi i së ardhmes së Evropës: Një perspektivë rinore”, ku përfaqësues të rinj nga e gjithë Evropa shkëmbyen ide me ambasadorë dhe ekspertë ndërkombëtarë dhe “Inteligjenca Artificiale formëson Demokracinë – Koha për Veprim”, ku u trajtuan ndikimet e AI në të ardhmen e demokracisë.
Universiteti Publik “Kadri Zeka” vlerëson lart përfaqësimin e Erletë Baliqit si dëshmi e cilësisë dhe përgatitjes së studentëve të tij për të qenë pjesë aktive e zhvillimeve ndërkombëtare. Kjo pjesëmarrje jo vetëm që promovon institucionin tonë në arenën evropiane, por edhe dëshmon për rolin e rëndësishëm që të rinjtë tanë mund të luajnë në ndërtimin e një Evrope më gjithëpërfshirëse dhe demokratike.
UKZ do të vazhdojë të mbështesë fuqishëm studentët në iniciativat që u japin atyre zë dhe hapësirë në nivele ndërkombëtare, duke kontribuar në fuqizimin e tyre profesional dhe qytetar.
