Sonte nata e tretë dhe e fundit e “Sunny Hill”, në skenë Anyma dhe Peggy Gou

Festivali më i madh muzikor në Kosovë, “Sunny Hill”, po vazhdon të mbahet në Bërnicë të Poshtme të Prishtinës, ku çdo vit mbledh dhjetëra mijëra pjesëmarrës nga vendi dhe diaspora.

I themeluar nga Dua dhe Dukagjin Lipa, festivali edhe këtë vit solli emra të njohur të muzikës botërore dhe shqiptare, por edhe momente të veçanta që do të mbesin gjatë në kujtesën e publikut.

Një nga ato momente ishte performanca emocionuese e Duas me babanë e saj, Dukagjin Lipa, në natën e parë të festivalit, ku kënduan bashkë këngën “Era”, përmes një interpretimi që ngjalli shumë reagime pozitive nga publiku.

Kurse mbrëmë, në natën e dytë, performuan artistë të njohur si PINT, Shawn Mendes, Ledri Vula, Era Istrefi, duke sjellë atmosferë të zjarrtë dhe energji të jashtëzakonshme në skenë.

Ndërsa sonte, në natën e tretë dhe të fundit të “Sunny Hill 2025”, skena do t’i takojë DJ-it amerikan Anyma dhe artistes koreane Peggy Gou, të cilët pritet të mbyllin festivalin me performanca elektrizuese.