Rekord i ri: Mbi 142 mijë aplikime për votim nga diaspora për zgjedhjet e 7 qershorit
Prishtinë, 18 maj 2026 – Komisioni Qendror i Zgjedhjeve ka pranuar 142,803 kërkesa për regjistrim për të votuar nga jashtë Kosovës për zgjedhjet e parakohshme parlamentare të 7 qershorit 2026, duke thyer rekordin e vitit 2021.
Nga totali i aplikimeve, 109,696 janë aprovuar, 7,325 janë refuzuar, ndërsa 25,702 mbeten në pritje për shqyrtim.
Rekordi i mëparshëm ishte vendosur në vitin 2021 me rreth 130 mijë kërkesa. Për zgjedhjet e parakohshme të 28 dhjetorit 2025, kishin aplikuar mbi 84 mijë qytetarë jashtë vendit, prej të cilëve 76 mijë aplikime u miratuan.
Sipas zëdhënësit të KQZ-së, Valmir Elezi, periudha e regjistrimit të votuesve jashtë Kosovës përfundoi më 17 maj 2026. Mënyra më e përzgjedhur e votimit mbetet përmes postës.
“Prej 109,696 aplikimeve të aprovuara, 81,901 shtetas janë regjistruar për të dërguar pakon me fletëvotim në kutinë postare jashtë Kosovës, 2,855 për ta dërguar në kutinë postare të KQZ-së në Kosovë, dhe 24,940 janë regjistruar për të votuar fizikisht në përfaqësitë diplomatike”, deklaroi Elezi më 18 maj.
Votimi përmes postës do të zhvillohet nga 25 maj deri më 6 qershor 2026, ndërsa votimi fizik në përfaqësitë diplomatike do të organizohet më 6 qershor. KQZ ka funksionalizuar kutitë postare në 23 shtete, përfshirë Kosovën, listën e të cilave do ta bëjë publike gjatë kësaj jave.
Fillimisht ishte planifikuar që votimi të organizohej në 48 përfaqësi diplomatike me 70 vendvotime, nga të cilat 33 ambasada dhe 15 konsullata. Megjithatë, KQZ do të rishikojë listën pasi disa përfaqësi kanë më pak se 50 votues të regjistruar. Sipas rregullores, në raste të tilla votuesit kalojnë automatikisht në votim përmes postës dhe njoftohen nga KQZ.
Më 5 maj 2026, KQZ miratoi listën e Qendrave të Votimit në përfaqësitë diplomatike dhe caktoi numrin maksimal prej 66,450 votuesish që mund të regjistrohen për votim fizik më 6 qershor.
Në listën votuese për 7 qershorin janë 22,131 votues të rinj. Prej tyre, 16,933 kanë mbushur 18 vjeç pas zgjedhjeve të 28 dhjetorit 2025, ndërsa 5,198 janë regjistruar për herë të parë në Regjistrin Qendror Civil ose kanë rikthyer shtetësinë e Kosovës. Nga votuesit e rinj, 51.70% janë meshkuj dhe 48.30% femra.
Pas zgjedhjeve të 28 dhjetorit 2025, nga Lista Votuese janë larguar 6,219 persona: 5,826 për shkak të vdekjes dhe 393 për humbje të shtetësisë, sipas të dhënave të Agjencisë së Regjistrit Civil. Gjithashtu, 6,797 persona nuk janë përfshirë në listë pasi janë evidentuar si të vdekur përmes krahasimit me regjistrat e ARC-së, Departamentin e Pensioneve, bashkësitë fetare dhe verifikimet në terren.
Zgjedhjet e parakohshme të 7 qershorit 2026 vijnë pas dështimit të zgjedhjes së presidentit brenda afatit të përcaktuar nga Gjykata Kushtetuese pas zgjedhjeve të 28 dhjetorit 2025. Seanca e Kuvendit e nisur më 27 dhe përfunduar më 28 prill 2026 dështoi për shkak të mungesës së kuorumit pas bojkotit të opozitës.
