Qeveria e Kosovës mbështet 37 specializantë nga Lugina e Preshevës
Këshilltari i Kryeministrit, Ragmi Mustafi, ka njoftuar se gjatë mbledhjes së 5-të të Qeverisë së Republikës së Kosovës është miratuar vendimi për mbështetjen financiare të 37 specializantëve të mjekësisë me vetëfinancim, shumica e të cilëve janë të rinj nga Lugina e Preshevës.
Sipas Mustafit, ky vendim përbën një hap të rëndësishëm në përkrahjen e të rinjve dhe në adresimin e sfidave të vazhdueshme me të cilat përballen shqiptarët në këtë rajon, veçanërisht në fushën e arsimit dhe punësimit. Ai theksoi se mbështetja për specializantët është një investim i drejtpërdrejtë në sistemin shëndetësor dhe në të ardhmen profesionale të brezit të ri.
Mustafi gjithashtu shprehu mirënjohje për Kryeministrin Albin Kurti dhe Ministrin e Shëndetësisë Arben Vitia për angazhimin e tyre në mbështetje të të rinjve nga Lugina e Preshevës. Ky vendim konsiderohet si vazhdimësi e mbështetjes institucionale, pasi edhe në vitet e kaluara dhjetëra specializantë janë përfshirë në skema të ngjashme financimi.
