Përurohet libri më i ri poetik i Nexhat Rexhës “Mes gurësh përkunden ëndrrat”
Në kuadër të veprimtarive letrare “Shpalime pranë vere”, më 25 prill 2026, në ambientet e Bibliotekës “Fan S. Noli” në Gjilan, u përurua libri më i ri poetik i shkrimtarit Nexhat Rexha, me titull “Mes gurësh përkunden ëndrrat”.
Ky vëllim poetik është botuar nga shtëpia botuese “Faik Konica” në Prishtinë dhe është mbështetur financiarisht nga Komuna e Kamenicës, në shënim të 70-vjetorit të lindjes së autorit dhe 40-vjetorit të veprimtarisë së tij letrare.
Aktiviteti u drejtua nga shkrimtarja Albina Idrizi, ndërsa me nga një fjalë rasti u paraqitën drejtori për kulturë i Komunës së Kamenicës, Afrim Dërvishi, si dhe botuesi Nazmi Rrahmani, të cilët vlerësuan lart krijimtarinë e autorit dhe rëndësinë e këtij botimi.
Për librin folën edhe redaktori, prof. dr. Anton Nikë Berisha, si dhe studiuesi Arsim Halili. Ndërkohë, poetja Kaltrinë Berisha solli fragmente nga një vështrim letrar i Timo Mërkurit. Vlerësimet ishin të njëzëshme se “Mes gurësh përkunden ëndrrat” përmbush kërkesat estetike të letërsisë dhe renditet ndër veprat më të realizuara të Nexhat Rexhës, duke pasuruar njëkohësisht edhe letërsinë shqipe.
Veprimtaria u shoqërua me deklamime poezish nga ky vëllim, të interpretuara nga Linditë Ramushi Dushku, Liridonë Mehmeti dhe Yllka Pireva.
Në përmbyllje të aktivitetit, një fjalë falënderuese mbajti edhe vetë autori, Nexhat Rexha, duke shprehur mirënjohje për pjesëmarrësit dhe mbështetësit e veprës së tij.
