Barazim me tensione në kryendeshje: Prishtina dhe Gjilani ndajnë pikët
Derbi mes FC Prishtina dhe SC Gjilani është mbyllur pa fitues, me rezultat 1-1, në kuadër të javës së 30-të të elitës së futbollit kosovar.
Pjesa e parë u karakterizua nga lojë e fortë në mesfushë dhe duele të shumta fizike, por pa raste konkrete shënimi nga asnjëra skuadër.
Në fraksionin e dytë, loja mori tjetër rrjedhë, e shoqëruar edhe me vendime të diskutueshme nga gjyqtari Genc Nuza. Në minutën e 58-të, mysafirët gjetën golin, por ai u anulua pas rishikimit me VAR.
Vetëm dy minuta më vonë, Gjilani fitoi penallti, ndërsa mbrojtësi i Prishtinës, Christopher Mamengi, u ndëshkua me karton të kuq. Nga pika e bardhë, Senad Jarovic u tregua i saktë, duke kaluar mysafirët në epërsi 0-1 në minutën e 61-të.
Megjithatë, reagimi i Prishtinës ishte i menjëhershëm. Vetëm në aksionin pasues, Arjol Bllaca barazoi shifrat në 1-1.
Deri në fund të takimit nuk pati raste të tjera të theksuara, dhe të dy ekipet u detyruan të kënaqen me nga një pikë.
Pas këtij barazimi, Prishtina mbetet në vendin e tretë me 45 pikë, ndërsa Gjilani renditet i katërti me 44 pikë.
