Përkujtim në 555 Vjetorin e vdekjes së Gjergj Kastrioti – Skënderbeu

Gjergj Kastrioti – Skënderbeu, si një personalitet i historisë mesjetare, i cili në të njëjtën kohë mbrojti edhe qytetërimin evropian, është më e nderuara dhe më e madhëruara figurë e shqiptarëve.

Një luftëtar dhe udhëheqës i jashtëzakonshëm i mbrojtjes së lirisë, i njohur si princi i arbërve apo princi i epirotëve, i cili, siç dihet, jetoi në kulturën shkrimore si ‘legjendë’ dhe si ‘histori’.

Skënderbeu është figurë emblematike e kombit shqiptar që është thirrur për ndihmë e është kujtuar në kohë të mbrapshta e dramatike për me e zmbraps të keqen e me i ndihmue pajtimit, lirisë e pavarësisë së shqiptarëve.

Figura e Gjergj Kastriotit, nga koha e Barletit, i cili njihet i pari që shkroi për të, e deri më sot, ka tërhequr vëmendjen e shkrimtarëve, historianëve, politikanëve, studiuesve të letërsisë së shkruar e të letërsisë popullore, studiuesve të historisë së religjioneve, të historisë së qytetërimeve, të piktorëve, të skulptorëve, të kompozitorëve, të regjisorëve, e të rapsodëve.

Dhe, janë të pafundmë librat dhe artikujt që janë shkruar për të. Dhe, portretet që janë bërë për të në skulpturë, pikturë, vizatim, monedha, pulla postare, kartolina, posterë. Disa nga këto lloje të materialeve janë të ruajtura në koleksionet e Bibliotekës Kombëtare të Kosovës.

Edhe pas më shumë se 5 shekujsh për Gjergj Kastriotin – Skënderbeun, dalin fakte interesante dhe të pazbuluara ndonjëherë, duke u bazuar në dokumente, letra zyrtare, pamflete, traktate, kronika, regjistra, të gjetura në arkivat turke dhe në ato të vendeve evropiane, deri dhe studime të shoqëruara me burime. Ky material jashtëzakonisht i vlefshëm për historinë dhe të bëmat e Gjergj Kastriotit, që shtrihet aq shumë, në shumë vende dhe në shumë gjuhë, do të kërkohet për t’i gjetur vend në një formë edhe në arkivat dhe bibliotekat e Kosovës.