Përfshirja e komuniteteve në proceset e shtetit, thelbësore për realizimin e të drejtave të tyre
Përfshirja e komuniteteve në proceset shtetërore është thelbësore për realizimin e të drejtave të tyre, përfshirë të drejtat sociale, dhe për ndërtimin e një shoqërie gjithëpërfshirëse ku çdo qytetar gëzon trajtim të barabartë.
Kështu u tha në takimin e sotëm të Këshillit Konsultativ për Komunitete, nën kryesimin e presidentes Vjosa Osmani, raporton KosovaPress.
Në këtë takim u shqyrtuan çështje të rëndësishme që lidhen me nevojat dhe prioritetet e komuniteteve në vend, me fokus në pjesëmarrjen e tyre të barabartë në jetën shoqërore, institucionale dhe ekonomike.
Anëtarët e Këshillit shprehën mirënjohjen e tyre për presidenten Osmani, duke vlerësuar lart përkushtimin e saj në adresimin dhe përkrahjen e çështjeve të komuniteteve, si dhe gatishmërinë e saj për të qenë gjithmonë pranë tyre në zgjidhjen e sfidave dhe avancimin e të drejtave të barabarta për të gjithë.
