Organizohet ecje përkujtimore në Koshare për heroin Agim Ramadani – Katana dhe dëshmorët e lirisë
Në bjeshkët e Koshares është mbajtur një ecje përkujtimore në nderim të heroit Agim Ramadani – Katana dhe të gjithë dëshmorëve që ranë për lirinë e Kosovës.
Aktiviteti u zhvillua në një nga vendet më simbolike të luftës çlirimtare, aty ku u thye kufiri shqiptaro-shqiptar gjatë Betejës së Koshares.
Ecjes iu bashkua edhe kryetari i Komunës së Gjilanit, Alban Hyseni, së bashku me anëtarë të Klubit Alpin Gjilani dhe shumë qytetarë e dashamirë të bjeshkatarisë.
Kryetari Hyseni tha se kjo ecje shërben për të kujtuar sakrificën dhe heroizmin e dëshmorëve që dhanë jetën për lirinë e vendit.
“Përmes kësaj ecjeje në gjurmët e historisë sonë, nderuam veprën e Agim Ramadanit – Katana dhe rikthyem në kujtesë një nga betejat më të lavdishme të luftës çlirimtare”, u shpreh ai.
Ai falënderoi Klubin Alpin Gjilani dhe të gjithë pjesëmarrësit për organizimin dhe pjesëmarrjen në këtë aktivitet përkujtimor, duke theksuar se liria e Kosovës është ndërtuar mbi sakrificë dhe qëndresë.
