Nis mbyllja e Qendrës së Paraburgimit në Gjilan, objekti do t’i kalojë Danimarkës për ekzekutimin e dënimeve
Ka nisur procesi i mbylljes së Qendrës së Paraburgimit në Gjilan dhe transferimi i personave të privuar nga liria drejt institucioneve të tjera korrektuese në Kosovë.
Lajmi është bërë i ditur nga Oda e Avokatëve të Kosovës, e cila ka njoftuar se është informuar zyrtarisht nga Shërbimi Korrektues i Kosovës për fillimin e këtij procesi, në kuadër të zbatimit të marrëveshjes ndërmjet Republikës së Kosovës dhe Mbretërisë së Danimarkës.
Sipas njoftimit, objekti i Qendrës së Paraburgimit në Gjilan do të shfrytëzohet për ekzekutimin e dënimeve të shqiptuara nga autoritetet daneze, në bazë të traktatit të nënshkruar mes dy vendeve.
“Ka filluar procesi i mbylljes së Qendrës së Paraburgimit në Gjilan, në kuadër të zbatimit të traktatit ndërmjet Republikës së Kosovës dhe Mbretërisë së Danimarkës për shfrytëzimin e këtij objekti për ekzekutimin e dënimeve të shqiptuara nga autoritetet daneze”, thuhet në njoftimin e Odës së Avokatëve.
Nga Shërbimi Korrektues i Kosovës është bërë e ditur se transferimi i të paraburgosurve do të bëhet gradualisht dhe në faza, duke u bazuar në vlerësimet e sigurisë, kapacitetet akomoduese dhe nevojat operative të institucioneve korrektuese.
Oda e Avokatëve ka theksuar se njoftimi është bërë me qëllim të informimit në kohë të komunitetit të avokatëve dhe për të lehtësuar komunikimin me klientët e tyre gjatë kësaj periudhe tranzitore.
Kosova dhe Danimarka në vitin 2022 nënshkruan një marrëveshje 10-vjeçare për transferimin e të burgosurve nga shteti nordik. Sipas marrëveshjes, Danimarka do të marrë me qira rreth 300 qeli të burgut në Gjilan, ndërsa Kosova pritet të përfitojë mbi 200 milionë euro gjatë periudhës së zbatimit të saj.
Marrëveshja parasheh që në Kosovë të transferohen vetëm persona të dënuar që nuk kanë kryer vepra të rënda penale, nuk janë të dënuar me mbi 10 vjet burgim dhe nuk kanë probleme të shëndetit mendor.
