Në Gjilan hapet panairi Rajonal “Anamorava mirëpret diasporën”
Drejtoria për Zhvillim Ekonomik e Komunës së Gjilanit, në bashkëpunim me Odën Ekonomike të Kosovës, ka hapur Panairin Rajonal “Anamorava mirëpret Diasporën” – një aktivitet i rëndësishëm që synon fuqizimin e lidhjes mes vendlindjes dhe mërgatës sonë.
Të pranishëm në këtë panair ishin Drejtori për Zhvillim Ekonomik i Komunës së Gjilanit, z. Enver Shabani,Drejtoresha për Zhvillim Ekonomik në Komunen e Kamenicës,Drejtoresha e Odes Ekonomike-Dega në Gjilan,Nënrkyetarja e Komunës së Gjilanit dhe Drejtori i Odes Ekonomike të Kosovës.
Në emër të kryetarit të Komunës, Alban Hyseni, pjesëmarrësit i ka përshëndetur nënkryetarja Leonora Morina Bunjaku, e cila theksoi rëndësinë e këtij panairi për ndërlidhjen mes komunitetit vendor dhe atij të diasporës.
Ajo theksoi se ky panair është një mundësi e jashtëzakonshme për të promovuar prodhimet vendore, për të forcuar bashkëpunimin me bizneset jashtë vendit, dhe për të dëshmuar se diaspora nuk përfaqëson vetëm kontribut financiar, por është gjithashtu një burim i dijes, përvojës dhe partneriteteve të qëndrueshme.
“Gjilani gjithmonë e ka konsideruar diasporën si një pjesë të pandashme të zhvillimit dhe të ardhmes së vet.
Prandaj, si komunë, në bashkëpunim me OEK-un, jemi të përkushtuar që ky bashkëpunim të jetë i qëndrueshëm, konkret dhe frytdhënës”, theksoi ajo, duke falënderuar organizatorët, ekspozuesit dhe veçanërisht mërgatën për praninë dhe përkushtimin ndaj vendlindjes.
Kryetari i Odës Ekonomike të Kosovës, z. Lulzim Rafuna, foli për rëndësinë shumëdimensionale të panairit, duke theksuar veçanërisht rolin e grave në zhvillimin ekonomik:
“Pa fuqizimin e gruas nuk ka ekonomi të fortë.
Ky panair është më shumë se një vend ekspozimi – është një dëshmi e sakrificës, qëndrueshmërisë dhe suksesit të grave në biznes,” u shpreh Rafuna.
Ai vlerësoi se ky panair nuk përfaqëson vetëm një ekspozim produktesh, por edhe një vend ku frymëzimi, përkushtimi dhe bashkëpunimi konkret marrin formë reale.
