Ndërroi jetë Jakup (Avdullah) Berisha, një nga themeluesit e brezave të parë të futbollit në Gjilan

Gjilani ka humbur një nga figurat e tij më përfaqësuese në sport dhe arsim. Ka ndërruar jetë Jakup (Avdullah) Berisha, veteran i futbollit, punëtor shumëvjeçar i arsimit dhe një nga emrat referues të fillimeve dhe zhvillimit të futbollit në Rajonin e Gjilanit.

Jakup Berisha i takonte brezave të parë që u morën aktivisht me futboll në Gjilan, në një kohë kur sporti po merrte formë dhe identitet në këtë pjesë të Kosovës. Ai ishte ndër të paktët veteranë që, përmes karrierës së tij, mbeti pikë referimi për fillesat e futbollit gjilanas dhe për klubet që e identifikuan dhe e ndërtuan këtë sport në qytet ndër dekada.

Karrierën sportive e nisi herët, si 15-vjeçar në C. Zvezda të Gjilanit, duke u shquar menjëherë si talent i rrallë. Vetëm dy vite më vonë, në moshën 17-vjeçare, Berisha arriti të përfaqësojë Kombëtaren e ish-Jugosllavisë, një arritje e jashtëzakonshme për kohën dhe një moment historik për futbollin e Kosovës dhe shqiptarët në përgjithësi.

Ai ishte ndër të vetmit futbollistë nga Kosova dhe hapësirat e tjera shqiptare që u bë pjesë e përfaqësueses së ish-Jugosllavisë, duke luajtur përkrah emrave të mëdhenj të futbollit të asaj kohe si Shekullarac, Shoshkiq, Galiq, Stipiq, Popoviq, Mugosha dhe Mlladenoviq. Talentin dhe potencialin e tij e kishte vlerësuar lart edhe selektori i atëhershëm, Misha Paviq, i cili e kishte konsideruar Berishën si një nga talentët më premtues të asaj periudhe.

Gjatë karrierës së tij aktive, Jakup Berisha mbrojti ngjyrat edhe të klubeve si Liria e Prizrenit dhe Trepça e Mitrovicës, duke lënë gjurmë të dukshme kudo që luajti. Përveç suksesit sportiv, ai u dallua për korrektësinë, disiplinën dhe përkushtimin ndaj lojës, vlera që e shoqëruan gjithë jetën.

Pas përfundimit të karrierës si futbollist, Berisha vazhdoi të kontribuojë në futboll edhe si trajner dhe zyrtar sporti. Ai ishte trajner i C. Zvezdës së Gjilanit në vitet 1973–1975 dhe i KF Dritës në periudhën 1982–1984. Në vitet 1993–1996, ishte përgjegjës i grupit të Ferizajit në kuadër të Ligës së Parë të Futbollit të Kosovës, në një periudhë të vështirë kur garat zhvilloheshin jashtë terreneve zyrtare dhe në rrethana të jashtëzakonshme.

Nga viti 1991 deri më 2000, Jakup Berisha ishte anëtar i Kryesisë së Federatës së Futbollit të Kosovës, duke dhënë kontribut të rëndësishëm në organizimin dhe konsolidimin e futbollit kosovar në vitet e para të funksionimit të saj.

Jakup (Avdullah) Berisha do të kujtohet si një njeri i përkushtuar ndaj futbollit dhe arsimit, si pjesë e brezit që vendosi themelet e këtij sporti në Gjilan dhe si figurë që la gjurmë të pashlyeshme në historinë e futbollit kosovar.

Njoftimi mortor nga familja:

Njoftim mortor
Varrimi i Jakup (Avdullah) Berishës bëhet më 12.02.2026, në orën 12:00, në varrezat e qytetit të Gjilanit.
Të pamet mbahen nga data 13.02.2026 deri më 15.02.2026, në Restorant “Luli”, në Gjilan.

TV Gjilani shpreh ngushëllimet më të sinqerta familjes Berisha dhe gjithë komunitetit sportiv e arsimor për këtë humbje të madhe.