Ndahet nga jeta Prof. Dr. Nuhi Rexhepi, studiues i shquar i letërsisë shqipe dhe profesor shumëvjeçar universitar
Me pikëllim të thellë është pritur lajmi për ndarjen nga jeta të Prof. Dr. Nuhi Rexhepit, njërit prej studiuesve të njohur të letërsisë shqipe dhe profesorit shumëvjeçar të Fakultetit të Filologjisë të Universitetit të Prishtinës, i cili me punën dhe përkushtimin e tij la gjurmë të pashlyeshme në arsimin e lartë dhe në studimet albanologjike.
Lajmi për vdekjen e tij është bërë i ditur nga familjarët përmes një njoftimi mortor, ku thuhet:
“Me pikëllim të thellë njoftojmë familjarët, miqtë, kolegët dhe dashamirët se është ndarë nga jeta më i dashuri ynë, Dr. Prof. Nuhi Rexhepi.”
Sipas njoftimit të familjes, ceremonia e varrimit do të mbahet më 9 korrik 2026, me fillim në ora 16:45, në Varrezat e Qytetit të Prishtinës, në Arbëri.
Prof. Dr. Nuhi Rexhepi lindi në vitin 1942 në Pogragjë të Gjilanit. Arsimin fillor e kreu në vendlindje, ndërsa Shkollën Normale në Prishtinë dhe Gjakovë. Studimet universitare i përfundoi në Degën e Gjuhës dhe Letërsisë Shqipe të Fakultetit Filozofik në Prishtinë, në vitin 1967.
Studimet pasuniversitare i vijoi në Fakultetin Filozofik të Beogradit, ndërsa në dhjetor të vitit 1995 mbrojti doktoraturën në Fakultetin e Filologjisë të Universitetit të Prishtinës me temën “Interpretimi i letërsisë shqipe në tekstet shkollore të Kosovës 1945–1990”, duke dhënë një kontribut të rëndësishëm në fushën e metodikës dhe studimeve letrare.
Karrierën e tij profesionale e nisi si mësues në vendlindje, më pas si arsimtar në Obiliq dhe profesor i gjuhës shqipe në Shkollën Normale dhe Shkollën e Lartë Pedagogjike në Gjilan. Në vitin 1972 u zgjodh asistent në lëndën Historia e Letërsisë II në Fakultetin e Filologjisë të Universitetit të Prishtinës, ku më vonë shërbeu si ligjërues, docent, prodekan i fakultetit dhe shef i Katedrës së Gjuhës dhe Letërsisë Shqipe.
Gjatë dekadave të angazhimit të tij akademik, Prof. Dr. Nuhi Rexhepi edukoi breza të tërë studentësh, duke u dalluar për përkushtimin në mësimdhënie, kërkimin shkencor dhe zhvillimin e studimeve të letërsisë shqipe. Emri i tij mbetet i lidhur ngushtë me arsimin universitar dhe me kontributin në albanologjinë shqiptare.
Ndarja e tij nga jeta përbën një humbje të madhe për familjen, kolegët, studentët dhe gjithë komunitetin akademik shqiptar.
