Ndahen çmimet për letërsi nga Ministria e Kulturës, Rinisë dhe Sportit.
Ministria e Kulturës sot ka dhënë Çmimin Kombëtar Letrar për Vepër Jetësore “Azem Shkreli” dhe çmimet tjera vjetore për letërsi. Me vendim të jurisë profesionale, çmimi “Azem Shkreli” iu dha shkrimtarit Adem Gashi, për kontributin e tij më shumë se dyzet vjeçar në krijimtarinë letrare.
Çmimi për veprën më të mirë në prozë “Anton Pashku” iu dha autorit Mehmet Kraja për romanin “Liria ime” ndërsa çmimi për veprën më të mirë në poezi “Ali Podrimja” i është dhënë Xhevdet Bajrajt për librin “Burri që lozte me engjëjt”
.Çmimin për veprën më të mirë për fëmijë dhe të rinj “Vehbi Kikaj” e mori Shaip Grabovci për dramën “Zëra nga vitrina” kurse çmimi për veprën më të mirë në kritikë letrare dhe eseistikë “Ibrahim Rugova” iu dha autores Blerina Rogova-Gaxha, për studimin “Vdekja në letërsinë moderne shqipe”.
Ndërsa çmimin për veprën më të mirë të përkthyer në gjuhën shqipe “Pjetër Bogdani” e mori Col Mehmeti, për përkthimin e veprës “Meditime” nga Mark Aureli.Juria që ka bërë përzgjedhjen e fituesve ka qenë në përbërje nga Agim Vinca – kryesues, Majlinda Bregasi, Isak Shema, Ag Apolloni dhe Ervina Halili.
