“Mollëkuqet 2026” rikthen magjinë e festivalit të fëmijëve në Gjilan – 34 talente të rinj ngjiten në skenë më 1 Qershor
Gjilani do të vishet sërish me ngjyrat, buzëqeshjet dhe emocionet e festivalit më të dashur për fëmijë. Në Ditën Ndërkombëtare të Fëmijëve, më 1 qershor 2026, rikthehet edicioni i 13-të i festivalit “Mollëkuqet”, një ngjarje tashmë tradicionale që për vite me radhë ka zbuluar e promovuar talentet e rinj muzikorë.
Nën atmosferën festive dhe plot energji pozitive, këtë vit në skenë do të ngjiten plot 34 fëmijë të talentuar, të cilët do të sjellin këngë, emocione dhe interpretim të sinqertë para publikut.
Organizatorët premtojnë një edicion të veçantë, me shumë muzikë, surpriza dhe momente të paharrueshme për fëmijët dhe familjet që do të jenë pjesë e këtij festivali.
“Mollëkuqet” tashmë konsiderohet si një nga festivalet më të rëndësishme për fëmijë në Anamoravë dhe më gjerë, duke u kthyer në një hapësirë ku talenti i vogël merr guxim, zë dhe dritë skene. Për shumë fëmijë, ky festival ka qenë hapi i parë drejt rrugëtimit artistik dhe muzikor.
Edicioni i sivjetmë do të mbahet në ambientet e “Vali Ranch Resort”, me fillim nga ora 14:00, ndërsa interesimi i publikut pritet të jetë i madh, sidomos për faktin se festivali organizohet pikërisht në Ditën e Fëmijëve.
Prindër, familjarë dhe dashamirë të muzikës për fëmijë janë ftuar të bëhen pjesë e këtij organizimi, për të përkrahur yjet e vegjël që do të ndriçojnë skenën me talentin dhe ëndrrat e tyre.
“Mollëkuqet 2026” nuk është vetëm festival – është festë e fëmijërisë, artit dhe shpresës.
