LDK: Procesi i votimit në Kuvend shkel rendin kushtetues, do të ketë përgjegjësi politike dhe institucionale
Lidhja Demokratike e Kosovës ka reaguar pas seancës së thirrur për zgjedhjen e Presidentit të Republikës së Kosovës, duke e cilësuar nisjen e procesit të votimit si shkelje të rendit kushtetues të vendit.
Sipas komunikatës së LDK-së, nisja e votimit pa kuorum kushtetues përbën, siç thuhet, “sabotim të drejtpërdrejtë të Kushtetutës dhe vetë shtetit”, duke e quajtur këtë veprim abuzim me Kuvendin e Kosovës dhe përpjekje për imponim politik.
LDK thekson se Republika e Kosovës nuk mund të merret peng dhe se rendi kushtetues nuk është i negociueshëm, duke paralajmëruar pasoja për zhvillimet e fundit në Kuvend.
Në fund të reagimit, partia opozitare ka bërë të ditur se për aktin e mbrëmshëm do të ketë përgjegjësi politike, institucionale dhe nacionale.
