Kryetari Hyseni: Do të vazhdojmë të mbështesim arsimin profesional
Zëvendësministri i Arsimit, Përparim Kryeziu, ka vizituar Gjilanin, ku është prit nga drejtori për Arsim, Jeton Rexhepi.
Fokus i kësaj vizite ishin tri shkollat profesionale të Komunës së Gjilanit.
Pas takimit në DKA, zëvendësministri fillimisht vizitoi Shkollën e Mesme Teknike “Mehmet Isai”, ku u njoftua nga afër me profilet e shkollës, kabinetet përcjellëse, investimet e realizuara dhe projektet zhvillimore të paraqitura nga drejtuesit e saj.
Më pas, së bashku me drejtorin dhe stafin përcjellës, ai vizitoi objektin në ndërtim të shkollës së re të mjekësisë “Dr. Asllan Elezi”, ku u informua për dinamikën e punimeve dhe përkushtimin që projekti të përfundojë brenda afateve kontraktuale.
Në kuadër të mësimit dual, një model që po forcon lidhjen ndërmjet arsimit dhe tregut të punës, zëvendësministri Kryeziu dhe drejtori i DKA-së, Rexhepi, morën pjesë në ceremoninë e diplomimit të gjeneratës së dytë të Shkollës së Agrobiznesit “Sahit Baftiu”, drejtimi kuzhinieri, ku uruan nxënësit e diplomuar për suksesin e arritur.
“Arsimi dual konsiderohet një nga zhvillimet më të rëndësishme në arsimin profesional parauniversitar në Kosovë, duke krijuar ura të forta ndërmjet shkollës dhe tregut të punës, si dhe duke i përgatitur të rinjtë për jetë dhe profesion përmes kombinimit të mësimit teorik me praktikën në kompani dhe biznese”, tha drejtori Rexhepi.
Kryetari i Komunës së Gjilanit, Alban Hyseni, tha se me kënaqësi të veçantë shënuan diplomimin e gjeneratës së dytë të Arsimit Dual në Shkollën e Mesme të Agrobiznesit dhe Teknologjisë “Sahit Baftiu”.
Sipas tij ky sukses është rezultat i partneritetit të shkëlqyeshëm me bizneset lokale, në këtë rast edhe me biznesin Astoria, që kanë kontribuar në aftësimin praktik dhe profesional të nxënësve tanë.
I pari i Gjilanit, theksoi se arsimi dual ka rezultuar shumë i suksesshëm, sepse një numër i madh i nxënësve, menjëherë pas diplomimit kanë pranuar oferta pune nga kompani të ndryshme.
“Si Komunë e Gjilanit, do të vazhdojmë të mbështesim arsimin profesional dhe bashkëpunimin me sektorin privat, me synimin që të rinjtë tanë të kenë më shumë mundësi zhvillimi dhe punësimi në vendin e tyre. Urime të gjithë nxënësve për diplomimin dhe suksese në rrugëtimin e tyre profesional”, tha kryetari Alban Hyseni.
