Klubi i Gjimnastikës “Halil Alidema” – Gjilan, histori suksesi dhe përkushtimi në sportin e gjimnastikës
Klubi i Gjimnastikës “Halil Alidema” nga Gjilani, i cili zhvillon aktivitete edhe në Komunën e Vitisë, vazhdon të jetë një nga shembujt më të mirë të punës, përkushtimit dhe zhvillimit të gjimnastikës në Kosovë.
Që nga themelimi në vitin 2015, klubi ka arritur rezultate të jashtëzakonshme, duke dëshmuar vazhdimësi dhe seriozitet në punën e tij përgjatë më shumë se një dekade aktivitetesh sportive.
Sukseset e klubit lidhen ngushtë me trajnerin dhe drejtuesin Hazir Alidema, kontributi i të cilit konsiderohet vendimtar në zhvillimin e kësaj fushe sportive mjaft të veçantë dhe ende jo shumë të përhapur në vendin tonë. Përmes përkushtimit të vazhdueshëm, ai ka arritur të ndërtojë një klub model, që sot njihet për disiplinë, profesionalizëm dhe rezultate konkrete.
Klubi “Halil Alidema” ka marrë pjesë rregullisht në garat e Federatës së Gjimnastikës së Kosovës, duke u dalluar me paraqitje të suksesshme në nivel lokal dhe kombëtar. Gjimnastet e këtij klubi kanë dëshmuar potencial të madh, kreativitet dhe talent të veçantë, duke treguar se Kosova ka kapacitete serioze për zhvillimin e gjimnastikës ritmike dhe akrobatike.
Ndër emrat më të njohur që kanë përfaqësuar klubin ndër vite janë: Viola Haziri, Tara Latifaj, Dea Mehmeti, Nejla Mehmeti, Mara Shabani, Lorena Idrizi dhe Erleta Sopi, të cilat kanë qenë aktive dhe të suksesshme në gara të ndryshme.
Në garën e fundit të organizuar më 16 maj në Prishtinë nga Federata e Gjimnastikës së Kosovës, në nivelin “B”, klubi mori pjesë me 13 gjimnaste. Në këtë aktivitet shkëlqyen disa prej sportisteve më premtuese të klubit.
Feroza Ismajli realizoi një sukses të madh duke fituar pesë medalje – tri vende të para dhe dy vende të dyta. Ndërkohë, juniorja Lorena Idrizi dominoi në tri disiplina, duke fituar tri vende të para dhe triumfuar edhe në garën kryesore të shumëgarëshit.
Po ashtu, rezultate shumë të mira shënuan edhe Erleta Sopi në disiplinën parter, si dhe Viola Haziri e Tara Latifaj, të cilat u vlerësuan për performancat e tyre inkurajuese.
Rezultatet e fundit dëshmojnë qartë se ky klub vazhdon të prodhojë talent dhe të zhvillojë sportiste me potencial të madh për të ardhmen. Megjithatë, drejtuesit e klubit theksojnë se mungesa e kushteve dhe pajisjeve profesionale mbetet një sfidë serioze.
Sipas Hazir Alidemës, klubit ende i mungojnë pajisje esenciale si trari ekuilibror, kali i kapërcimeve dhe paralelja e shkallëzuar, të cilat janë të domosdoshme për zhvillimin profesional të gjimnastikës, por kanë kosto të lartë për mundësitë aktuale të klubit.
Ai apeloi që institucionet lokale dhe ato qendrore, përfshirë MKRS-në, të ofrojnë më shumë mbështetje për këtë sport, duke marrë parasysh punën dhe rezultatet e arritura ndër vite.
Hazir Alidema bëri të ditur se gjimnastet e klubit çdo vit marrin pjesë në kampe stërvitore pesëditore në Durrës të Shqipërisë, falë mbështetjes së pjesshme nga Komuna e Vitisë, për të cilën shprehu mirënjohje dhe falënderim.
Në fund, ai theksoi se nevojitet edhe shumë punë për ta ngritur gjimnastikën kosovare në nivele ndërkombëtare, por shprehu bindjen se me përkushtim, mbështetje dhe strategji të mirëfillta, edhe Kosova mund të ketë një ditë përfaqësim dinjitoz në ngjarje të mëdha sportive ndërkombëtare.
