KFOR-i Turk viziton SHFMU “Afërdita” në Kishnapolë, diskutohen projekte për digitalizimin e mësimit
Përfaqësues të KFOR-it Turk kanë realizuar një vizitë në Shkollën Fillore dhe të Mesme të Ulët “Afërdita” në Kishnapolë, ku u diskutua për bashkëpunimin e vazhdueshëm dhe mbështetjen ndaj procesit edukativo-arsimor, raporton TV Gjilani.
Gjatë takimit, palët biseduan për projekte konkrete që pritet të realizohen në këtë institucion arsimor, me theks të veçantë në digitalizimin e procesit mësimor. Projektet e planifikuara përfshijnë sigurimin e kompjuterëve dhe projektorëve, me qëllim të aplikimit të metodave më moderne dhe inovative në zhvillimin e njësive mësimore.
Drejtoresha e shkollës, Zyrije Shala, theksoi rëndësinë e këtyre projekteve për përmirësimin e cilësisë në mësimdhënie dhe krijimin e kushteve më të mira për nxënësit.
“Projektet për të cilat kemi diskutuar lidhen drejtpërdrejt me avancimin e procesit mësimor dhe shpresojmë që ato të realizohen sa më parë, në dobi të nxënësve dhe të shkollës në përgjithësi”, ka thënë Shala.
Ajo ka falënderuar KFOR-in Turk për vizitën, interesimin dhe kontributin e vazhdueshëm në Kosovë, duke vlerësuar rolin e tyre në mbështetjen e institucioneve arsimore përmes aktiviteteve dhe donacioneve.
“Falënderim për vlerësimin dhe për këtë dhuratë të veçantë, si shenjë mirënjohjeje për bashkëpunimin e mirëfilltë dhe të suksesshëm”, ka deklaruar për TV Gjilani drejtoresha Shala.
