Irani ka 400 kilogramë uranium të pasuruar. Pyetja kyçe: Ku ndodhet?

Pas sulmeve ajrore të Izraelit ndaj objekteve bërthamore iraniane, ish-zëvendësdrejtori i përgjithshëm i Agjencisë Ndërkombëtare për Energji Atomike (IAEA), Olli Heinonen, deklaroi se Izraeli ka gjasa të ketë shkaktuar dëme serioze në programin bërthamor të Iranit.

Në një intervistë për BBC Radio 4, Heinonen tha se objektit në Natanz “do t’i duhen të paktën disa vite për t’u rikuperuar”, duke shtuar se edhe objekti në Fordow “është në gjendje shumë të keqe pas këtyre sulmeve”.

Pyetja kyçe – ku ndodhen rezervat?

Megjithatë, Heinonen paralajmëroi se pyetja më e rëndësishme që mbetet është se ku i mban Irani rezervat e uraniumit të pasuruar në shkallë të lartë. Sipas tij, Irani ka mbi 400 kilogramë uranium të tillë, dhe nëse ekziston një vend i fshehtë ku vazhdohet pasurimi deri në nivelin e përshtatshëm për armë, pa mbikëqyrjen e IAEA-së, kjo përbën një problem serioz.

Sulmet izraelite, të njohura si “Operacioni Luani Zgjohet”, filluan të premten e kaluar dhe kishin në shënjestër objektet kryesore bërthamore iraniane, përfshirë Natanzin dhe Esfahanin, si dhe baza ushtarake e qendra komanduese. Kryeministri izraelit Benjamin Netanyahu deklaroi se qëllimi i operacionit ishte të pengohej Irani në zhvillimin e armëve bërthamore, duke theksuar se Irani tashmë zotëronte mjaftueshëm uranium të pasuruar për ndërtimin e disa bombave bërthamore. Netanyahu gjithashtu theksoi se operacioni ishte i drejtuar kundër regjimit iranian, e jo kundër popullit iranian.

Agjencia Ndërkombëtare për Energji Atomike (IAEA) më herët kishte raportuar se Irani ka shkelur detyrimet e tij sipas Traktatit për Mosshpërndarjen e Armëve Bërthamore (NPT), çka ka shtuar më tej shqetësimet e komunitetit ndërkombëtar për ambiciet bërthamore të Iranit.