Gjykata turke urdhëron burgosjen e Imamoglut
Një gjykatë turke urdhëroi që kryetari i Stambollit, Ekrem Imamoglu, të mbahet në burg të dielën deri në gjykim, raportoi CNN Turk, ndërsa protesta masive përfshinë vendin kundër ndalimit të tij për akuzat për korrupsion dhe lidhje me terrorizmin.
Prokurorët kërkuan nga gjykata që të burgoste Imamoglu – një rival kyç politik i Presidentit Recep Tayyip Erdogan – dhe katër ndihmësit e tij deri në gjykim, bëri të ditur zyra e tij, sipas agjencisë së lajmeve Reuters.
Imamoglu u mor në pyetje në gjykatë të shtunën, pasi ndalimi i tij nga autoritetet turke javën e kaluar shkaktoi disa nga protestat më të mëdha në vend në më shumë se një dekadë.
Që nga e enjtja, dhjetëra mijëra njerëz kanë dalë në rrugë në më shumë se një duzinë qytetesh në të gjithë vendin, përfshirë metropolin e Stambollit dhe kryeqytetin Ankara, në demonstrata kryesisht paqësore kundër ndalimit të Imamoglus.
Të dielën, gjykata burgosi zyrtarisht Imamoglun për akuza të lidhura me korrupsionin, sipas CNN Turk. Urdhri nuk lidhet me një hetim të veçantë mbi akuzat për ndihmë ndaj Partisë së Punëtorëve të Kurdistanit (PKK) dhe Bashkësisë së Kurdistanit (KCK), të cilat Turqia i konsideron organizata terroriste.
A.B / RTKlive
