Gjimnazi Shoqëror “Zenel Hajdini” shënon Ditën e Shkollës
Gjimnazi Shoqëror “Zenel Hajdini” në Gjilan ka shënuar Ditën e Shkollës me një manifestim të organizuar në një ditë të veçantë për institucionin, ku morën pjesë udhëheqja e shkollës, mysafirë, mësimdhënës, nxënës dhe donatorë.
Arben Zeqiri, në cilësinë e moderatorit, theksoi se në këtë ditë të veçantë të 15 Majit, zemra e çdo nxënësi, mësimdhënësi dhe punëtori të Gjimnazit “Zenel Hajdini” rreh më fort, pasi me krenari festojnë historinë dhe traditën e një institucioni me mbi 80 vite rrugëtim – një vatër dijeje që ka edukuar breza të tërë dhe ka lënë gjurmë të rëndësishme në arsim dhe shoqëri.
Drejtori i shkollës, Ilir Vokshi, tha se përveç Ditës së Shkollës, po festohen edhe përkushtimi, sukseset dhe vlerat e kësaj vatre të dijes, edukimit dhe formimit të brezave të rinj. Ai shprehu mirënjohje për mësimdhënësit që kanë kontribuar ndër vite, për nxënësit që janë krenaria e shkollës dhe kërkoi vazhdimin e rrugës së dijes, suksesit dhe vlerave.
Nxënësja Ardita Ajvazi u paraqit me një pikë muzikore, duke dëshmuar talentin dhe përkushtimin e nxënësve të kësaj shkolle.
Në këtë shkollë ka nxënës që, me talentin, disiplinën dhe angazhimin e tyre, kanë arritur rezultate të larta në lëndë të ndryshme mësimore, gara dhe aktivitete brenda dhe jashtë shkollës, duke ngritur lart emrin e institucionit. Çdo sukses i tyre u cilësua si dëshmi se puna, vullneti dhe mbështetja e përbashkët japin fryte.
Me këtë rast u shfaq edhe një dokumentar me aktivitete dhe angazhime të përzgjedhura të nxënësve gjatë vitit shkollor. Gjithashtu, u ndanë mirënjohje për miq dhe donatorë, si dhe u shpreh respekt për të gjithë mësimdhënësit që me profesionalizëm dhe përkushtim vazhdojnë ta mbajnë të fortë emrin e shkollës.
Mirënjohje të veçantë morën edhe drejtuesit e mëparshëm të shkollës për kontributin e tyre ndër vite në ngritjen e Gjimnazit “Zenel Hajdini” si shembull i disiplinës, profesionalizmit dhe suksesit.
Ky vit u vlerësua si i suksesshëm edhe në zhvillimin profesional të mësimdhënësve. U nderuan mësimdhënësit që kanë përfunduar me sukses trajnimin për Vlerësimin e Performancës në Mësimdhënie, duke u pajisur me certifikata për 20 orë zhvillim profesional. Certifikatat u shpërndanë nga Prof. Ever Këqiku, udhëheqës i organizatës KCIC.
Programi artistik vazhdoi me një interpretim muzikor nga nxënësi Egzon Robelli.
Në fund, u ndanë mirënjohje edhe për nxënësit për angazhimin dhe arritjet e tyre, ndërsa maturantet Ardita Ajvazi dhe Edrena Maliqi, kryetare e shkollës, u falënderuan për kontributin dhe vitet e kaluara në këtë institucion.
