Gjilani bëhet me sisteme kamerash bashkëkohore, funksionojnë me Inteligjencë Artificiale dhe ndërveprojnë në një platformë menaxhimi
Në qytetin tonë, janë vendosur sisteme kamerash të teknologjisë së fundit, të cilat kanë rezolucion të lartë dhe inteligjencë artificiale, shkruan faqja e Komunës së Gjilanit, duke i krahasuar ato me kamera të ngjashme të vendosura në metropole botërore, si Londër e New York.
“Sipas informatave, ky sistem mundëson identifikimin automatik të targave të automjeteve (ANPR) dhe integron të gjitha kamerat në një platformë të vetme menaxhimi. Pra sisteme të tila kamerash që tash janë në Gjilan, ekzistojnë vetëm në Londër e New York”.
Kryetari i Komunës së Gjilanit, Alban Hyseni, tha se tash ka më shumë siguri për Gjilanin tonë.
“Kemi pranuar një donacion të rëndësishëm nga miqtë tanë në Angli për zgjerimin dhe modernizimin e rrjetit të kamerave në qytet”, tha Alban Hyseni.
I pari i Gjilanit, theksoi se ky sistem i gjeneratës së fundit, me rezolucion të lartë dhe inteligjencë artificiale (AI), mundëson identifikimin automatik të targave të automjeteve (ANPR) dhe integron të gjitha kamerat në një platformë të vetme menaxhimi.
“Për momentin, këto sisteme kamerash ekzistojnë vetëm në Londër e New York, e nga sot edhe në Gjilanin tonë”, tha Hyseni.
Kryetari i Gjilanit, më tej shtoi se një donacion shumë i vlefshëm si ky, do ta rrisë dukshëm sigurinë publike të qytetit tonë dhe është hap i madh për një Gjilan më të sigurt dhe më modern. Ai falënderoi nga zemra për donacionin miqtë nga Anglia.
