Gjilan: Kryetari Hyseni, fton në takim kryetarin e degës së LDK-së Hazirin dhe atë të PDK-së Rashitin
Kryetari i Komunës së Gjilanit, Alban Hyseni, ka ftuar kryetarin e degës së LDK-së në Gjilan, Lutfi Haziri dhe ushtruesin e detyrës së kryetarit të degës së PDK-së në Gjilan, Riad Rashitin, për takim lidhur me votimin e buxhetit të vitit 2025.
Sipas kryetarit Hyseni, kjo ftesë po bëhet në vazhdën e përpjekjeve për tejkalimin e situatës së krijuar.
“Kemi pasur konferenca të jashtëzakonshme dhe seanca urgjente të shumta për të miratuar buxhetin, por pavarësisht këtyre përpjekjeve, nuk kemi arritur deri tash të biem dakord të bëjmë marrëveshje për miratimin e buxhetit”, tha Alban Hyseni.
I pari i Gjilanit, theksoi se tashmë kanë edhe një propozim të ri tjetër, që nesër të ftoi për takim dhe diskutime kryetarin e degës së LDK-së në Gjilan, Luftfi Haziri dhe ushtruesin e detyrës së kryetarit të degës së PDK-së në Gjilan, Riad Rashiti.
“Nesër në orën 10:00 i ftoj të vijnë në zyrën time dhe të diskutojmë me kryetarin e LDK-së e PDK-së për çështjen e aprovimit të buxhetit”, tha Hyseni.
Kryetari i Komunës së Gjilanit, shtoi se e kanë vullnetin që të takohen me z. Haziri dhe z. Rashiti, kur dihet se me parë kemi pasur takime me përfaqësuesit e tjerë të këtyre subjekteve, por pa rezultate konkrete.
“Presim që nesër të vijnë e bisedojmë për këtë çështje me interes publik dhe të kemi një takim që mund të dalim me një rezultat konkret nga ky takim”, tha kryetari i Komunës së Gjilanit, Alban Hyseni.
