Gjilan: Hyseni takon përfaqësues të Këshillave të Fshatrave, premton ndihmë nga komuna
Kryetari i Gjilanit, Alban Hyseni përmes faqes së tij në rrjete sociale ka njoftuar se ka takuar përfaqësues të lokaliteteve dhe fshatrave të Komunës së Gjilanit, për t’u njohur nga afër me nevojat e tyre në funksion të nismës për thellim të bashkëpunimit të ndërsjellë, shkruan TV Gjilani.
Këte takim Hyseni e ka zhvilluar që në fillim të vitit 2025, duke shfrytëzuar momentumin e prezencës së bashkëatdhetarëve në vendlindje, nëpër fshatrat e lokalitetet përkatëse.
“Vitin e nisim me takime të frytshme me këshillat e fshatrave dhe përfaqësuesit e shoqatave të bashkatdhetarëve tanë, duke përçuar mesazhin e bashkëpunimit dhe përkushtimit për të mirën e përbashkët”, ka shkruar Hyseni.
Kryetari Hyseni poashtu ka njoftuar se komuna e Gjilanit do të marrë përsipër një pjesë të obligimeve për mirambajtje të këtyre lokaliteteve, duke u koordinuar me Këshillat e Fshatrave.
“Në fshatrat Miresh, Pogragjë, Përlepnicë, Llashticë, Malishevë dhe Demiraj, mirëmbajtja dhe realizimi i projekteve do të bëhet në bashkëpunim të ngushtë mes komunës dhe banorëve. Kjo qasje synon të shërbejë si model i bashkëpunimit efektiv mes qytetarëve dhe institucioneve edhe në zona të tjera. Kontributi i bashkatdhetarëve, angazhimi i këshillave të fshatrave dhe përkushtimi i institucioneve janë bashkuar për të sjellë në jetë projekte me interes publik”, ka përfunduar Hyseni.
