Futbollisti gjilanas i Bayern Munich, Erblin Osmani, viziton bashkëvendësit dhe nderon të rinjtë e futbollit
Futbollisti gjilanas i Bayern Munich, Erblin Osmani, viziton bashkëvendësit dhe nderon të rinjtë e futbollit
Futbollisti gjilanas i Bayern Munich, Erblin Osmani, ka qenë mysafir special në ceremoninë e ndarjes së medaljeve dhe trofeve të organizuar nga Liga Rajonale e Futbollit në Gjilan, duke sjellë emocion dhe motivim të veçantë për futbollistët e rinj dhe pjesëmarrësit e shumtë në këtë aktivitet.
Prania e Osmanit u prit me entuziazëm nga sportdashësit dhe të rinjtë, të cilët patën mundësinë të takojnë nga afër një futbollist që po ndërton karrierën e tij në një nga klubet më të njohura evropiane.
Në emër të kryetarit të LRF Gjilan, Armend Misini, organizatorët shprehën mirënjohje të veçantë për Erblin Osmanin dhe familjen e tij për vizitën dhe mbështetjen e vazhdueshme ndaj futbollit vendor. Sipas tyre, ky bashkëpunim është një hap i rëndësishëm drejt forcimit të lidhjeve me futbollistët gjilanas që veprojnë në vende të ndryshme të botës.
Gjatë ceremonisë u ndanë medalje dhe trofe për ekipet dhe futbollistët e dalluar. Një nga momentet më të veçanta të aktivitetit ishte dekorimi i futbollistëve të grupmoshës U17 të SC Gjilanit, të cilët u kurorëzuan kampionë të regjionit pas një edicioni shumë të suksesshëm. Djelmoshat e drejtuar nga trajneri Selajdin Jerliu pranuan medaljet e kampionit pikërisht nga Erblin Osmani, duke e bërë këtë moment edhe më domethënës për ta.
Pjesëmarrësit shfrytëzuan rastin për të realizuar fotografi me Osmanin, ndërsa atmosfera festive dëshmoi edhe një herë rëndësinë e promovimit të talenteve të reja dhe lidhjes së tyre me futbollistët që po përfaqësojnë Gjilanin në arenën ndërkombëtare.
Nga Liga Rajonale e Futbollit në Gjilan u uruan suksese të mëtejshme futbollistëve të SC Gjilanit U17 në garat nacionale të play-offit, ndërsa u ritheksua përkushtimi i organizatës për zhvillimin e futbollit rajonal dhe krijimin e mundësive të reja për brezat e rinj.
