FC Liria i beson vazhdimësinë Ismet Munishit, trajneri rinovon kontratën edhe për tri vite

FC Liria ka vendosur t’i besojë vazhdimësinë trajnerit Ismet Munishi, duke rinovuar bashkëpunimin me të edhe për tri vitet e ardhshme.

Lajmi është bërë i ditur nga klubi prizrenas, i cili e cilëson këtë vendim si një prej hapave të parë dhe më të rëndësishëm në ndërtimin e projektit të ri sportiv, të bazuar në stabilitet, besim dhe një vizion afatgjatë.

Sipas njoftimit të klubit, drejtuesit vazhdojnë të kenë besim të plotë në përvojën, profesionalizmin dhe punën e Ismet Munishit, duke e konsideruar atë një figurë kyçe në procesin e ndërtimit të ekipit dhe realizimit të objektivave të klubit në vitet e ardhshme.

FC Liria bën të ditur se, së bashku me trajnerin Munishi, do të punohet për krijimin e një skuadre konkurruese, me identitet të qartë loje dhe ambicie të mëdha, me synimin për ta rikthyer klubin në vendin që i takon në futbollin kosovar.

“Ky është një nga hapat e parë në vazhdimin e rrugëtimit të ri të klubit, i ndërtuar mbi stabilitet, besim dhe një vizion afatgjatë. Besimi i klubit në punën, përvojën dhe profesionalizmin e trajnerit mbetet i palëkundur”, thuhet në njoftimin e FC Lirisë.

Në fund, klubi i ka uruar Ismet Munishit suksese në vazhdimin e punës, duke shprehur bindjen se bashkëpunimi i ri do të sjellë rezultate pozitive dhe do t’i gëzojë tifozët bardhezi.